صناعت و سوداگرلیک وزیرلیگی منبعلریدن بیری آتی فاش ایتیلیشینی ایستمهی سلاموطندارنینگ تحقیقی بولیمی بیلن اوتکزگن صحبتیده ایتیشیچه، انچه پیت آلدین، سام ییغینیده یاردم بیرووچی مملکتلرگه افغانستان دولتی تامانیدن بیریلگن سوزلر اساسیده، صناعت و سوداگرلیک وزیرلیگی اداری فسادگه قرشی کورهشیش خصوصیده، ریجه تیارلهشینی ایتگن ایدی. بیراق، اوشبو ریجه تیارلنگنیدن کیین، صناعت و سوداگرلیک وزیرلیگینینگ ادارهلری، مالی و اداری فساد مسئلهلری باعث، مذکور ریجهگه قیته تیکلهنیشی یاکه لغو ایتیلیشینی سورهگنلر. اداری فساد مافیاسی، مذکور ریجه تیارلهنیشیگه حصه قوشگن صناعت و سوداگرلیک وزیرلیگی خصوصی بولیملرنی رواجلنتیریش اورین باسری داکتر عبدالباری رحماننینگ، اوستیگه فشار کیلتیریب و اونینگ استعفا بیریشگه مجبور قیلگن.
سوداگرلیک وزیرلیگی منبعسینینگ ایتیشیچه، مذکور ریجه حاضرگی کمچیلیکلر نظرده آلینیب و کیلهجکده اداری فساد باشقریلیشی خصوصیده تیارلنگن. بیراق، اداری فساد مافیاسی مذکور وزیرلیکده سیستم ایجاد ایتیلیشینی ایستمهیدی. اونینگ کوپهیتیریشیچه، بوندن کیین، مذکور ریجه وزیرلیک ادارهلریده یوباریلدی و قطار کیشیلر وزیرنینگ دفتریگه رسمی نامهلر یوللب، اداری فساد مسئلهسینی یاشیریش اوچون سعی و حرکت قیلگنلر.
صناعت و سوداگرلیک وزیرلیگی تامانیدن ارایه ایتیلگن ریجه اساسیده، مذکور وزیرلیک ادارهلریده احتمالی فساد موجودلیگی اوچ گروه ده قیزیل، سریغ و یشیل رنگلر بیلن نشانلنگن. بندرلر، دولتی تصدیلر، نفتی ماده تصدیسی و تدارکاتی ادارهلرده فساد موجودلیگی ایتیلگن. شونینگدیک، سوداگرلیک جوازنامهلرینی رویخطگه آلیب صادر ایتهدیگن و سوداگرلیک اتشهلری فساد میزانی درجه بندلیگیده ایکینچی اوریننی ایگهلب، سریغ رنگ بیلن نشان قیلینگن.
سوداگرلیک ایشلری اورین باسرلیگی، سوداگرلیک و ترانزیت ریاستی، بشری منبعلر ریاستی و خلق ارا سوداگرلیک عمومی ریاستی تامانیدن، صناعت و سوداگرلیک وزیرینینگ، دفتریگه یوباریلگن رسمی نامهلرده نه فقط فساد مسئلهسی ناتوغری دییلگن؛ بلکیم تکلیف بولینگن ریجهگه قیته تیکلهنیشی یاکه لغو ایتیلیشی سورهلگن. سوداگرلیک ایشلری بوییچه اورین باسری مزمل شینوارینینگ، نامهسینی بیر قسمتیده بوندهی یازیلگن: «تأکیدی شکلده دفتر و پلان ریاستلریگه بویروغ بیریلهدی کیم، حقیقتدن اوزاق و بوندهی ناتوغری حجت تیار قیلیشدن وازکیچیب، اداری فسادگه قرشی کورهشیش ریجهنی مذکور وزیرلیکنینگ حاضرگی وضعیتی و حقیقتلریدن خبردار ریاستلر فکرینی اورگهنیب و اوشبو وزیرلیک هیأت رهبرلیگی تصدیقیدن کیین، تیارلب و عملگه آشیریش کیرهک.»
صناعت و سوداگرلیک وزیرلیگینینگ، اداری فسادگه قرشی کورهشیش ریجهسی یاردم بیرووچی مملکتلرگه افغانستان دولتی تامانیدن بیریلگن سوزلر اساسیده، میلادی 2015- اداغیگچه تیارلهنیشی لازم ایدی، حاضر افغانستان جمهور رییسی اشرف غنینینگ، میزی اوستیگه قالگن و جمهور رییس بیلن وزیرلر کینگشی، مذکور ریجه تقدیری خصوصیده، قرار قیلیشلری لازم.
بیراق، دولتی ادارهلردهگی موجود اداری فساد مافیاسی، یاشیرین شکلده عمل قیلهدی، احتمال باریچه جمهورلیک سرایی و وزیرلر کینگشیده نفوذ قیلهدی و بو ریجهگه وزیرلر کینگشی و جمهور رییس تامانیدن قیته تیکلهنیب یاکه لغو ایتیلیشی احتمالدن اوزاق ایمس.
سام ییغینیده، یاردم بیرووچی مملکتلرگه افغانستان دولتی تامانیدن بیریلگن سوزلر اساسیده، میلادی 2015- ییل اداغیگچه بیش عایداتی وزیرلیک جملهدن صناعت و سوداگرلیک، کانلر، سالیق، ترانسپورت و هوانوردلیک و مخابرات و تکنالوژی وزیرلیکلریده مالی و اداری فسادنی تیکشیریب و اوشبو مسئلهگه قرشی کورهشیش خصوصیده، ریجه تیارلهیدی. اوشبو ریجه میلادی 2016- ییل اورتهسیگهقدر عملگه آشیریلهدی.
