افغانستان جمهورلیک ریاست سوزلاوچیسی صدیق صدیقی، جمهور رئیس محمداشرف غنی و عبدالله عبدالله نینگ آره‌سیده سیاسی بیر کیلیشوو بولیشی خصوصیده‌گی سوزلشوولرده کیلیشمه‌لر یوز بیرگنیدن خبر بیرگن.
بوگون «سه‌شنبه، 23- ثور» کابلده اوتکزیلگن خبری بیر ییغینده جناب صدیقی نینگ ایتیشیچه، اوشبو کیلیشوونامه نینگ اونملی اصولی اوستیگه کیلیشیلگن و حاضرهم ایکی تامان آره‌سیده کیلیشوو نهایی بولیشی اوچون سوزلشوولر دوام ایتماقده.
صدیق صدیقی، اوستیگه کیلیشیلگن اونملی اصول دن آت توتمه‌یدی، بیراق سلام‌وطندار کمیده ایکی هفته آلدین، محمداشرف غنی بیلن سیاسی بیر کیلیشووگه ایریشیش اوچون عبدالله عبدالله نینگ ریجه‌سیدن بیر نسخه‌سی گه قول تاپدی. عبدالله عبدالله گه یقین بیر منبع نینگ سلام‌وطندارگه ایتیشیچه، بو ریجه نهایی بولگن. اوشبو ریجه اساسیده، مرکزی و ولایتی اداره‌لر عبدالله عبدالله و محمداشرف غنی نینگ آره‌سیده تینگ شکلده تقسیم بولیشی ممکن.
جمهور رئیس سوزلاوچیسی نینگ اورغولشیچه، سیاسی کیلیشوونامه نینگ بوتون موضوعلری مملکت اساسی قانونی نینگ چارچوبه‌سیده عمل گه آشیریله‌دی. اونگه کوره، اوشبو کیلیشوونامه نهایی بولگنده، ارگ و سپیدار آره‌سیده بولگن موجود سیاسی قیین‌چیلیک‌لر حل ایتیله‌دی.
اوشبو موضوع توغریسیده سپیدار سرایی نینگ توشونچه‌سینی اورگنه آلمه‌دیک.
ایتیش کیره‌ک کیم، اوتگن کون افغانستان بوییچه شفافیت نی کوزه‌تووچی اداره بیر خبرنامه نشر قیلیب ایتیشیچه، ارگ و سپیدار آره‌سیده عدلی، نظارتی و انتظامی اداره‌لر تقسیم بولیشی توغریسیده کیلیشووگه ایریشیش اوچون بولگن مذاکره‌لردن خواطرده دیر.
افغانستان بوییچه شفافیت نی کوزه‌تووچی اداره، بوتون سیاسی گروهلردن شفافیت، حساب بیریش و امانت‌دارلیک نی اصلاحات چارچوبه‌سیده قرار بیریب، قضایی کوچ نینگ ایرکین‌لیگی گه حرمت قیلیب و عدلی و نظارتی اداره‌لرنینگ سیاسی‌لشتیریش دن قول تارتیش‌لرینی سوره‌دی.
