د ولسمشرۍ ماڼۍ وياند صدیق صديقي ويلي، حکومت د طالبانو د پاتې زندانيانو له ډلې يو شمېر يې خوشې کړي او د يادو زندانيانو د بلې برخې د خوشې کولو فني او کاري بهير هم دوام لري.
صديقي نن چهارشنبه پر خپله ټوېټرپاڼه ليکلي چې د تبادلې پروسه دوه اړخيزه ده او حکومت په هره مرحله کې د ياد بهير نظارت او ارزيابي کوي.
نوموړي زياته کړې، افغان دولت د سولې پروسه کې پر خپلو ژمنو عمل کړی او په دې پروسه کې د حکومت ژمنې د سولې د لويې مشورتي جرګې د پرېکړو له مخې عملي کېږي.
صديقي ويلي چې حکومت تمه لري طالبان هم د امنيتي ځواکونو خوشې کولو کې پر خپلو ژمنو پوره عمل وکړي.
افغان دولت تر اوسه پورې د طالبانو ۲۰۰ خطرناک زندانيان خوشې کړي او طالبانو هم تېره ورځ ۶ د کمانډو ځواکونه خوشې کړي دي.
ټاکل شوې د دواړو لوريو د ټولو زندانيانو له خوشې کولو وروسته د طالبانو او افغان حکومت ترمنځ مخامخ خبرې پيل شي.
د مصالحې د عالي شورا وياند فریدون خوځون هم نن سهار ويلي چې د زندانيانو د تبادلې پروسه پيل شوې او د يادې پروسې بشپړېدل بينالافغاني خبرو ته لار هواروي.
