هارون د میدان وردګو ولایت د پولیسو له اکاډومۍ فارغ و او د خپلو نورو ټولګیوالو سره د کابل ـ میدان وردګو په لار د طالبانو په پلان شوي برید کې ووژل شو.
د نوموړي پلار صابر وايي، چې زوی یې د حکومت د غفلت له امله ووژل شو.
حکومت هم تاییدوي، چې د میدان وردګو ولایت د پولیسو اکاډومۍ فارغ شویو افسرانو او سرتېرو په لېږدولو کې غفلت شوی او په همدې وجه یې د کورنیو چارو وزارت د لسو مسوولینو دندې وځنډولې.
۱۸ کلن هارون د پلار ۶ اولاد او د کور یوازینۍ ګټیالی و.
د ښوونځي له بشپړولو وروسته یې په پلورنځایونو کې د یوې ګولې روزۍ له پاره کارکولو؛ اړتیا او د افغان امنیتي ځواکونو له لیکو سره لېواتیا یې د میدان وردګو د پولیسو تر اکاډومۍ ورسولو.
د هارون پلار له سلام وطندار سره په خبرو کې وویل، چې د کور بل ګټیالی نه لري او حکومت هم ورسره هېڅ مرسته نه ده کړې.
صابر حکومت تورنوي، چې د امنیتي ځواکونو د قربانیانو کورنۍ ته پاملرنه نه کوي. دی وايي، تراوسه یې ۴۰ زره افغانۍ ورسره مرسته کړې؛ د زوی اکرامیه او د دوو میاشتو معاش یې نه دی ورکړی.
دغه دردېدلی پلار وايي، د حکومت د ناغېړیو او غفلت له امله حاضر نه دی، چې خپل بل زوی د امنیتي ځواکونو لیکو ته ورواستوي.
له میدان وردګو کابل ته د پولیسو روان کاروان، چې د طالب وسله والو تر څار لاندې و، د کمپنۍ په سیمه کې طالبانو پرې پرلپسې بریدونه وکړل ۲۳تنه په کې ووژل شول او ۵۸تنه په کې ټپیان شول.
