نن د حوت ۱۹مه، ټاکل شوې محمد اشرف غني او عبدالله عبدالله د ولسمشرۍ د لوړې مراسم ترسره کړي. وروسته له هغې چې ولسمشرۍ ماڼۍ اعلان وکړ د دوشنبې په ورځ د لوړې مراسم ترسره کوي، د ملي يووالي حکومت اجراييه رييس عبدالله عبدالله هم اعلان وکړ چې د ارګ د لوړې له مراسمو سره هم مهاله به دوی په سپېدار ماڼۍ کې د لوړې مراسم ترسره کوي. ولسمشرۍ ماڼۍ وايي، د ولسمشر په توګه د محمد اشرف غني د لوړې مراسمو ته تیاری بشپړ شوی او د ځینو هېوادونو د استازيو په ګډون به په دې مراسمو کې شاوخوا څلور زره کسان ګډون وکړي. له دې سره د عبدالله عبدالله د ټيم غړي هم وايي، دوی هم د لوړې مراسمو ته چمتووالی نیولی او څو شېبو کې به د لوړې مراسم ترسره کړي. دا په داسې حال کې ده چې ويل شوي وو دا مراسم به نن سهار ترسره کېدل خو د ځينو ستونزو سره کبله ځنډېدلي وو.
د ثبات او همپالنې ټاکنيزې ډلې مشر عبدالله عبدالله هم په سپېدرا ماڼۍ کې د ولسمشر په توګه د لوړې پرځای کړل.
له عبدالله عبدالله څو دقيقې وړاندې محمد اشرف غني د لوړې مراسم پر ځای کړل.
محمد اشرف غني او دواړو مرستيالانو يې په رسمي توګه د لوړې مراسم پر ځای کړل.
د ثبات او همپالنې ټاکنيزې ډلې مشر عبدالله عبدالله هم د لوړې د مراسمو لپاره په سپېدار ماڼۍ کې چمتو شوی دی.
محمداشرف غني د لوړې د مراسمو ترسره کولو لپاره سلامخانې ماڼۍ ته ورسېد.
محمد اشرف غني په رسمي توګه د لوړې مراسم پر ځای کړل.
رحمتالله نبیل: د لوړې د مراسمو پرځای کول چاته قدرت او مشروعيت نه ورکوي
د ولسمشرۍ ټاکنو يو نوماند رحمتالله نبيل د لوړې د مراسمو د پرځای کولو په غبرګون کې وايي چې نن جمهوريت خښول حتمي شول.
نبيل پر خپله ټوېټر پاڼه کې ليکلي چې د افغانستان دردېدلی ملت يو ځل بيا د سياست قرباني شو.
د افغان سولې لپاره د امريکا د بهرنيو چارو وزارت ځانګړی استازی زلمی خليلزاد، په کابل کې د امريکا سفير او افغانستان کې د ناټو ځواکونو قومندان سکاټ مېلر هم د محمد اشرف غني د لوړې مراسمو کې د ګډون په موخه ارګ ته رسېدلي دي.
د کاناډا، د اروپايي اتحاديې، د ډنمارک، اسټراليا، ناورې او المان سفيران هم د محمد اشرف غني د لوړې په مراسمو کې د ګډون په موخه ارګ ته رسېدلي دي.
د بهرنيو چارو سرپرست وزير هارون چخانسوري وايي چې د محمد اشرف غني د لوړې په مراسمو کې د ۳۵ هېوادو استازي او سفيران بلل شوي دي.
د چخانسوري په وينا، په دې مراسمو کې ۱۴ نړيوال بنسټونه چې افغانستان سره همکاري لري دې مراسمو کې ګډون لپاره بلل شوي دي.
په فرهنګي چارو کې د ولسمشر ستر سلاکار شاهحسين مرتضوي پر خپله ټوېټر پاڼه ليکلي چې د ولسمشر غني د لوړې مراسم به وروسته له غرمې په ۳ بجو وشي.
عبدالله عبدالله: د تقلبي رایو باطلول د بحران د ختمولو یوازینۍ لار ده
د ثبات او همپالنې ټاکنيزې ډلې مشر عبدالله عبدالله په يوه ټوېټ کې ليکلي چې ډېموکراسي او د قانون حاکمیت ته ژمن دي او هېڅوک باید ورته په کمه سترګه ونه ګوري.
معنوي: که چېرې ارګ د لوړې مراسم ترسره کړي، سپېدار به هم ياد مراسم ترسره کړي
د عبدالله عبدالله د لوړې د مراسمو د کميسيون رييس فضل احمد معنوي وايي، نن هېڅ ډول خبرې نه دي شوي چې ټاکنيزې ناندرۍ پای ته ورسوي.
د معنوي په وينا، تر اوسه چې کومې خبرې شوي ټولې بې پايلې وې.
نوموړی له عبدالله عبدالله سره د غربي ډيپلوماټانو خبرې نه ردوي او زياتوي، که ارګ د لوړې مراسم ترسره کړي دوی به يې هم وکړي.
د ټاکنو د خپلواک کميسيون رييسې حوا علم نورستانۍ او د ټاکنيزو شکايتونو د خپلواک کميسيون رييسې زهرې بيان شينوارې هم د محمد اشرف غني د لوړې په مراسمو کې د ګډون په موخه ارګ ته تللي دي.
پاکستان کې د پښتون ژغورنې د غورځنګ غړي محسن داوړ او علي وزير او د محمد اشرف غني د لوړې په مراسمو کې ګډون کړی.
د ننګرهار د والي وياند سلاموطندار ته وايي، هغوی نن سهار ننګرهار ته راورسېدل او اوسمهال په ارګ کې دي.
دا په داسې حال کې ده چې تېره ورځ محسن داوړ وويل چې د پاکستان فډرالي ادارې محسن داوړ او علي وزير ته افغانستان ته د تګ اجازه ور نه کړه.
د پاکستان د بهرنيو چارو وزارت ويلي چې د پاکستان د لومړي وزير عمران خان په لارښوونه يې دوی ته اجازه ورکړه تر څو افغانستان کې د ولسمشرۍ د لوړې په مراسمو کې ګډون وکړي.
