د سعودي عربستان لوی مفتي وايي، چې د داعش ډلې کړنې له اسلام او اسلامي ارزښتونو سره هيڅ رابطه نه لري.
لوی مفتي ځوانانو ته خبرداری ورکوي، چې باید د مذهب په نوم د دغې ډلې سره له يوځای کېدو جدي ډډه وکړي.
د شیخ عبدالعزیز په وینا، "ځکه چې د نويو ځوانانو څخه ناوړه ګټه اخیستل کيږي او ډېرو ناروا کړنو ته هڅول کيږي، چې دغه کړنې د اسلامي اصولو سره په ټکر کې دي".
شیخ عبدالعزیز د داعش ډلې کړنې په کلکو ټکو غندلي او ويلي يې دي، چې انسانانو ته اور ورته کول او نور ظلمونه په اسلامي قوانینو کې يو له سترو ګناهونو شمېرل کيږي.
د سعودي رسنيو د راپور له مخې عبدالعزیز الشیخ ويلي، چې دغه ډله داسې کارونه کوي، چې په ټوله معنا له اسلام سره په ټکر دي.
سعودي شیخ وايي، ځېنې هېوادونه غواړي د داعش ډلې په وسيله اسلام بدنام کړي.
