شفیق الله شفق ته د کرکټ بیا پیلولو اجازه ورکړل شوه

د افغانستان د کرکټ بورډ اجرایوي کمېټې د کرکټ ملي لوبډلې په تکړه لوبغاړي شفیق الله شفق نا اعلان شوی بندیز پاې ته ورسولو.

کرکټ بورډ د یوې خبرپاڼې په خپرولو سره ویلي، په شفیق الله شفق د ۶ میاشتو بندیز موده ختمه شوې او له دې وروسته د هر قسم کرکټ لوبې اجازه لري.

که څه هم شفیق الله شفق په وروستیو ۷ میاشتو کې د هېڅ کورني او نړیوال کرکټ کولو اجازه نه درلوده؛ خو نوموړي تېره میاشت د خوست په یو شخصي کرکټ ټورنامنټ کې ګډون کړی و او ښه ځلېدلی و.

خبرپاڼه کې راغلي، شفیق الله شفق د کرکټ بورډ له قوانینو سرغړونه کړی وه او له همدې کبله د روان کال مارچ میاشتې راپه دې خوا له کرکټ بندیز سره مخ و.

د بورډ خبرپاڼې د اجرایوي کمېټې له خولې لیکلي شفیق الله شفق د ۶ میاشتو بندیز پای ورسېد او باید په کورني کرکټ کې یو ځل بیا خپله وړتیا وښیي.

خبرپاڼه زیاتوي، چې د لوبغاړو لنډ مهالی بندیز په لوبډله کې د اصلاحاتو راوستو موخه دي.

شفیق الله شفق ته اجازه ورکړل شوې ده، چې د زونونو ترمنځ په روانو احمد شاه ابدالي ۴ ورځنیو کرکټ سیالیو کې د نوې شاملې شوې لوبډلې (کابل ګرین) لوبډلې په ګټه لوبې وکړي.

د کریم صادق په کپټانۍ کې یادې لوبډلې تراوسه ۲ سیالۍ کړي، چې دواړه سیالۍ یې په ستر توپیر مس عینک زون لوبډلې ته بایللي دي.

خبرپاڼې د شفیق الله شفق له قوله لیکلي، چې کرکټ سیالیو ته په راستنېدو خوښ دی او هڅه به وکړي، په راتلونکي کې شوې سرغړونې تکرار نه کړي.