د بامیانو سیمهییز مسوولان وايي د دغه ولایت کهمرد، سیغان او ورس ولسوالیو کې د پرلپسې ورښتونو او سېلابونو له کبله د دغو ولسوالیو اوسېدونکیو ته درانه زیانونه اوښتې دي.
د سیغان ولسوالۍ اجرایوي مدیر عبدالحبیب سیلاني وايي، د ثور له ۱۱ مې نېټې تر ۲۹ پورې د پرلپسې ورښتونو او سېلابونو له کبله په دې ولسوالۍ کې ۱۰ د استوګنې کورونه، ۱۷ کیلومتره سړک، دوه ښوونځي او ۳۵۰ جریبه کرنیزه ځمکه ویجاړه شوې دي.
د کهمرد ولسوال محمد سیغاني سلاموطندار ته وویل چې سېلابونو نږدې ۵۰ سلنه دغه ولسوالۍ له منځه وړې ده.
په بامیانو کې له طبیعي پېښو سره د مبارزې اداره هم مني چې د سختو ورښتونو او سیلابونو له کبله د کهمرد، سیغان او ورس ولسوالیو اوسېدونکي زیانمن شوي دي.
د بامیانو له طبیعي پېښو سره د مبارزې کمېټې رییس رضا رفعت وايي، په کهمرد ولسوالۍ کې شاوخوا ۱۸۲ کورونه ویجاړ شوي او د دهنه سیغان سړک د سېلاب له امله بند شوی دی.
سختو ورښتونو او سېلابونو د بامیانو په نورو سیمو کې درانه مالي زیانونه پرځای پرېښې دي خو تراوسه د اوښتي زیان په اړه کره شمېرې په لاس کې نه شته.
