کابلبانک سهمدارلریدن بیری خلیلالله فیروزی، مذکور بانک نینگ داراییلری تالان قیلینگن جنجللی ماجراسی ده دخیل ایدی و حاضر قماقخانهدن اویی گه انتقال بیریلگن. فیروزی نینگ قوییب یوباریلیشی مملکت ملی خوفسیزلیک ریاستی نینگ سابق باشلیغی رحمتالله نبیل گه کوره، کوپینچه عکسالعمللر بیلن بیرگه ایدی و اینگ اونملی بولگنی قوییب یوباریلیشی بدلی ده جمهور رئیس غنی گه 30 میلیون دالر توللشی دیر.
فیروزی بوندن آلدین یا-ده کیین قوییب یوباریلگنهد، بوندهی جنجللر وجودگه کیلمس ایدی، بیراق جمهورلیک ریاست سیلاوی عرهفهسیده قوییب یوباریلیشی «سوراق توغدیرگن.»
سیاسی ایش بیلرمانلردن بیرقطاری، فیروزی نینگ قوییب یوباریلیشی جمهورلیک ریاست سیلاوی گه باغلیق دییدی.
جمهورلیک ریاست سیلاوی نینگ نامزدلریدن بیری و ملی خوفسیزلیک ریاستی نی سابق باشلیغی رحمتالله نبیل، اوتگن کون اوز رسمی فیسبوک صحیفهسیده یازیشیچه، خلیلالله فیروزی، محمداشرف غنی نینگ رهبرلیگی ده بولگن دولت قورووچی تیمی نینگ سیلاو کمپاینلری اوچون 30 میلیون دالر توللش بدلیده قماقخانهدن قوییب یوباریلگن.
سیاسی ایش بیلرمان عارف کیانی نینگ ایتیشیچه، بوندهی بیر شرایطده خلیلالله فیروزی قوییب یوباریلیشی خصوصیده جمهور رئیس نینگ قیلگن حرکتی پرده آرقهسیده معامله بولگنینی کورستهدی. جناب کیانی گه کوره، جمهور رئیس تامانیدن فیروزی قوییب یوباریلیشی قانون گه قرشی دیر.
افغانستان بوییچه ایرکین و عدالتلی سیلاو بنیادی یا-ده فیفا باشلیغی یوسف رشیدنینگ ایتیشیچه، جناب نبیل نینگ بو توغریده حجتی بولگن صورتده، اونی کوپراق تیکشیریلیشی اوچون میدیالر و نظارتچیلرنینگ حضوریده سیلاو شکایتلرینی تینگلش کمیسیونی گه تاپشیریشی کیرهک.
بیراق، جمهورلیک ریاست سرایی نینگ سوزلاوچیسی صدیق صدیقی، خلیلالله فیروزی 30 میلیون دالر بدلی ده قوییب یوباریلگنی خصوصیده جناب نبیل نینگ ادعاسینی رد قیلگن. صدیق صدیقی گه کوره، فیروزی نینگ ساغلیک وضعیتی یامان بولگنی باعث، اویی گه انتقال بیریلگن و نظارت آستیده دیر.
کابلبانک هیأتی نینگ سابق باشلیغی و مذکور بانک نینگ سهمدارلریدن بیری خلیلالله فیروزی، بیش ییل آلدین، تالان قیلیش و پول یوویش جنایتی گه عیبلنیب کابلبانک قیینچیلیگینی تیکشیریش خاص محکمه تامانیدن 10 ییل حبس گه محکوم بولگن ایدی.
کابلبانک میلادی 2010- ییلده بحران گه اوچرهگنیدن سونگ، مدیریتی نی افغانستان دولتی قولگه آلدی و محکمه بحران عامللرینی قماققه محکوم قیلدی. میلادی 2014- ییلده محمداشرف غنی، بو دوسیهنی قیتهدن آچدی و افغانستان یوکسک محکمهسی نینگ حکمی اساسیده، کابلبانک نینگ اصلی اساسچیلری جناب فیروزی و شیرخان فرنودلردن هر بیری 10 ییل حبس و هر بیری 300 میلیون دالر توللش گه محکوم بولیشدی.
