مملکت جمهور رییسی محمد اشرف‌غنی یقین آره ده صادر قیلگن فرمانیده، سیلاولر مستقل کمیسیونی نینگ بوتون اعضالرینی آلدینگی امتیاز بیلن اوز مصلحتچیسی ایتیب تعین قیلدی. جمهور رییس نینگ بو تدبیری تورلی قتلم ایچیده کینگ اعتراضلر همده عکس‌العمللرگه سبب بولدی.
نماینده‌لر مجلسی نینگ بیرقنچه‌سی اعضاسی، بیلیم یورت استادلری ینه مدنی فعاللر جمهور رییس سیلاولر کمیسیونی نینگ سابق اعضالریگه بونده‌ی امتیاز بیریش بیلن سابق سیلاولرده‌گی ییریک ساخته‌کارلیکنی یاشیریش اوچون حرکت قیله‌دی دیگنلر.
بیلیم یورت استادی طاهر هاشمی، جمهور رییس غنی ملی منفعتلرگه ضد و حقوقی مساله‌لر و قانونی بی‌خبرلیکلر یوزیه‌سیدن سیلاولر سابق کمیسیون اعضالرینی مصلحتچیسی صفتیده تعین قیلگن دیدی. اونینگ سوزلریگه کوره، حکومت دیکتاتورلیک همده بیر تامانلمه حرکت قیله باشله‌گن. جمهور رییس نینگ بو ایشی ایسه حکومت و خلق اراه‌سیده فاصله توغدیره‌دی دیگن جناب هاشمی.
بیلیم یورت نینگ اوشبو استادی، سیلاولر کمیسیون سابق اعضالریگه جمهور رییسلیک سرایی تامانیدن بو قبیل امتیاز بیریلیشی اوتکزیلگن جمهور رییسلیک سیلاولرده تلقب بارلیگینی آچیق آیدین اثبات قیله‌دی دیگن.
مدنی فعال عبدالودود، جمهور رییس غنی سیلاولرده گی سِرلر یاشیریش اوچون سیلاولر کمیسیون اعضالرینی مصلحتچیسی صفتیده تعین قیلیشگن دیدی. اونینگ سوزلریگه کوره، سابق کمیشنرلر ینگی لوازمگه آلینیشی یخشی حکوچیلیک ینه اداری فسادگه قرشی کوره‌ش‌نی سوال آستیگه آلیشی باره‌سیده تاکید قیلگن.
نماینده‌لر مجلسی نینگ اعضاسی عبدالرحمن رحمانی، سیلاولر کمیسونی نینگ سابق اعضالری جمهور رییس تامانیدن ینگی ایشگه آلینیشی اساسی قانونگه ضد بیر عمل دیگن.
اجراییه ریاستی سوزلاووچیسی‌نینگ اورین باسری امید میثم، سیلاولر کمیسیونلری نینگ سابق اعضالری جمهور رییس نینگ مصلحتچیسی ایتیب تعیین له‌نیشی ملی بیرلیک حکومتی نینگ قراری اساسیده بولمه گن بیر ایش دیدی.
لیکن، بو توغریده جمهور رییسلیک سرایی هر قنده‌ی فکر بیلدیریشدن باش تارتدی.
اوتکزیلگن سابق جمهور رییسلیک سیلاولر مملکت‌ده گی اینگ جنجللی سیلاولردن حسابلنه‌دی. اوزاق مددتلی جنجللر نهایت‌ده امریکه قوشمه ایالتلری نینگ تشقی ایشلر وزیری جانکری واسطه‌چیلیگی بیلن ملی بیرلیک حکومتی یوزه گه کیلیشی بیلن یکونلنگن ایدی.
