سیلاولر مستقل کمیسیونی کیلگوسی سیلاولرده عیال سیلاوچیلرگه قُولیلیک یرهتیش اوچون ینگی بیر لایحه اوستیده ایش باشلهگن. افغانستانده شفاف سیلاولر ایشی بیلن مشغول تشکیلات «عیاللر نمایندهلری مسوولیتی و افغانستانلیک عیاللر رولی کوچلهنیشی» نامی آستیده اوتکزیلگن ییغینده، مذکور تشکیلات نینگ ینگیدن خاتینلر توغریسیده قولگه کیریتگن سوراوی نشر قیلنگن.
اوشبو تشکلات نینگ اعضالری، بولرنینگ قولگه کیریتگن معلوماتلریده نابرقرارلیک، اقتصادی قشاقلیک و سیلاولر ترغیبات جریانیده خاتین – قیزلرگه قرشی سلبی تبلیغات یولگه قوییلیشی کیلگوسی سیلاولرده عیاللرنینگ مقابلیده تورگن ییریک مشکللردن بولگنی اورگه نیلگن.
افغانستان شفافیت سیلاولر فعالیتی بیلن مشغول ادارهنینگ سوزلاووچیسی حبیبالله شینواری، کابللیک عیاللر تورلی بولیملرده جدی قیین چیلیکلر بیلن روپه ره ایکن لیکلرینی بیلدیردی.
اونینگ تعبیریچه، سیلاولر ترغیبات جریانیده خاتین – قیزلر اوچون دییرلی زمینه یره تیلمهگن.
سیلاولر مستقل کمیسیونی نینگ سابق اعضالری، سیلاولر ترغیبات آقیمیده خاتین – قیزلر بعضی بیر قیین چیلیکلر بیلن دوچار بولگن لیکلرینی رد قیلمهی، عیاللر قرشیسیدهگی موجود معمالرنی بر طرف قیلیب، کیلگوسی سیلاولرده بو قتلم نینگ رولی آشیریلیشی خصوصیده خبر بیرگنلر.
خبری ییغینده سوزلهگن کمیسیوننینگ اعضاسی ملیحهحسن، مذکور لایحه کوچگه کیریتیلیشی بیلن کیلگوسی سیلاولرده خاتینلر نامزدلیک، رای بیریش و اجرایی همده عملیاتی بولیمگه کوپراق حضورلری آشیشی ممکن دیگن.
افغانستان شفاف سیلاولر بنیادی نینگ اعضالری، بولر مذکور سوراونی کابللیک سوادلی عیاللر، سیاستچیلر، فعال خاتین – قیزلر و نخبه عیاللر بیلن اوتکزگن صحبت نتیجهسیده تیارلب نشر قیلگن.
تشکیلات اوشبو سوراو قنچه کیشی اوستیدن اوتکزیلگن لیگی بارهسیده انیق رقم معلوم قیلمهگن.
