جیم‌لیک دوره‌سی باشله‌نیشی بیلن سیلاولردن نظارت قیلیووچی قطار نهادلر ایری ییغین‌لر آرقه‌لی، سیلاو کونلریده ساخته‌کارلیک یوز بیریشیدن خواطر بیلدیرگن‌لر.
افغانستان بوییچه شفاف سیلاو بنیادی یا-ده تیفا باشلیغی محمدنعیم ایوب‌زاده نینگ ایتیشیچه، آواز بیرووچی‌لردن بیللی ارقام ترقه‌تیلمه‌گنی، عیال ایشلاوچی‌لرنینگ کم‌لیگی، بایومتریک‌دن فایده‌لنیش خصوصیده تعلیمات بیریلمه‌گنی، قومندانلر و حاکم‌لرنینگ دخالتی، ناتینچلیک و بیرقطار آواز بیریش مرکزلرنینگ باغلنگنی اولرنینگ خواطرلنتیرگن موضوع‌لردن دیر.
جناب ایوب‌زاده گه کوره، مرکزلر آچیقلیگی و یاپیقلیگی خصوصیده، سلیقه‌یی یانده‌شیش، ایریم تومن‌لرده آواز بیرووچیلرنینگ رقمی بیلن جمعیت ضدلیگی و بایومتریک اسکونه‌لری ایش بیریشی توغریسیده بولگن چیگل‌لیک موضوعلری سیلاو شافیتی گه نسبتن اولرنینگ ایشانچ‌سیزلیگی گه سبب بولگن.
افغانستان بوییچه ایرکین و عدالت‌لی سیلاو بنیادی یا-ده فیفا مسووللری، امنیتی مسووللرنینگ سیلاو لایحه‌سیده دخالت قیلیشیدن خواطر بیلدیرگن‌لر. اولر حکومت مسووللریدن سیلاو کونیده هیچ‌بیر نامزد منفعتی‌گه فعالیت قیلمی و مردمی لایحه‌گه دخالت قیلمه‌یش‌لرینی سورهگنلر.
افغانستان بوییچه ایرکین و عدالت‌لی سیلاو بنیادی یا-ده فیفا باشلیغی یوسف رشید، سیلاولر ایرکین کمیسیونی‌دن سیلاو کونیده قولگه کیلگن معلومات‌لرنی اهالی بیلن شریک قیلیشی‌نی سوره‌گن.
بوتوغریده سیلاولر ایرکین کمیسیونی مسووللری نینگ فکرینی آلیش اوچون سعی و حرکت قیلدیک، بیراق موفق بولمه‌یدیک.
عین‌حالده، سیلاولردن نظارت قیلیووچی نهادلر، اهالیدن کینگ شکلده سیلاوگه اشتراک قیلیب و اوشبو لایحه‌دن نظارت قیلشی‌نی سورهگنلر.
