کابلده اوتکزیلگن تدقیقات معلوماتی گه کوره، سیلاو نامزدلریدن 60% دن آرتیغی اصلی مسؤولیتلری توغریسیده هیچ نرسه بیلمهیدی.
بوگون «دوشنبه» کابلده خبری بیر ییغین اوتکزگن افغانستان یاشلر مدنی-اجتماعی اویغونلشتیرووچی مرکزی، «بیلیب آواز بیریش» نامیده اوتکزگن تدقیقات نتیجهسینی ترقهتدی.
سیاسی بیلیم و نامزدلرنینگ حقوقی توغریسیده اوتکزیلگن اوشبو تدقیقات معلوماتیگه کوره، نامزدلردن 24% ییترلیچه سیاسی و حقوقی بیلیم، 33% اورته سیاسی و حقوقی بیلیم و باشقه 43% جوده قویی یا-ده قبول قیلینمس سیاسی و حقوقی بیلیم گه ایگه بولگنلر.
مذکور مرکز سوزلاوچیسی جمعهخان پویانینگ ایتیشیچه، اوشبو تدقیقاتده ارایه ایتیلگن سوراق و موضوعلر بوندهی بولگن، «سیزنینگ ایشانچینگیزگه کوره، نمایندهلر کینگشیده بیر نمایندهنینگ مسؤولیتی نیمه دیر؟»
- قانونلرنی بیلگیلش لایحهسیده اشتراک قیلیش و اجراییه قوه ایشلریدن نظارت قیلیش؛
- قانوننی عملگه آشیریش؛
- اساسی قانوندن حمایت قیلیش؛
- اوچاوی.
جناب پویاگه کوره، جواب بیرووچیلردن 61% جوابی ناتوغری بولگن و جواب بیرووچیلردن یالغیز 39% بو سوراققه توغری جواب بیرگنلر.
اوشبو تدقیقات اساسیده، تدقیقاتده اشتراک قیلگن 203 نامزد جملهسیدن 6% نینگ دکترا حجتی، 29% نینگ ماسترلیک حجتی، 54% نینگ لیسانس حجتی و شونینگدیک، باشقه 9% نینگ بکلوریا یا-ده 12- صنف حجتی بولگن.
اوتکزیلگن تدقیقات نینگ جواب بیرووچیلریدن 57% انسانی بیلیم بولیملریده، 28% ساینس یا-ده طبیعی بیلیم بولیملریده، 8% حربی بیلیم ده و باشقه 7% دینی بیلیم بولیمیده تعلیم کورگنلر.
نامزد ایرککلر و عیاللر آرهسیده فایز فرقی توغریسیده افغانستان یاشلر مدنی-اجتماعی اویغونلشتیرووچی مرکز سوزلاوچیسینینگ ایتیشیچه، جواب بیرووچیلردن 84% ایرککلر و باشقه 16% عیاللر ایکن.
مذکور مرکز مسؤوللریگه کوره، اولرنینگ تدقیقاتیگه قرهگنده، کیلهجک نمایندهلر کینگشیده متخصص بولمهگن و سوادسیز کیشیلر یول تاپیشی ممکن.
افغانستان یاشلر مدنی-اجتماعی اویغونلشتیرووچی مرکزنینگ تدقیقاتی اساسیده، اولرنینگ تدقیقاتیده اشتراک قیلگن نامزدلردن یالغیز 22% سیلاو تنیقلیگیگه بوتونلهی ایشانهدی و باشقه نامزدلر سیلاو جریانی تنیقلیگی و ایرکینلیگیگه اونچهلیک ایشانمهیدیلر.
اوشبو مرکز مسؤوللرینینگ ایتیشیچه، اولر سوراقلرینی کابلده 400 نامزد بیلن شریک قیلگن و بو جملهدن یالغیز 203 نامزد سوراققه جواب بیرگن.
