کابل‌نینگ شهرنو منطقه‌سیده انتحاری و پارتلش هجوم یوزبیرگنیدن بیرهفته اوتماقده، کورنیشچه انه‌شو ییر قیته‌دن معمولی وضعیت‌نی اوزیگه آلگن.
بیراق حقیقت انه‌شو که همه نیرسه اوز جایگه قیتگن ایمس و بازارنینگ آلیب‌ساتیش وضعیت گه اوزگریشلیک کیلگن. کییم ساتووچیلر، نانوالر، رستورانت صاحب‌لری، کست ساتووچیلر و قولگه ساته‌دیگن‌لر انتحار و پارتلش دن سونگ آلیب ساتیش وضعیتی یمان بولگنی دن خواطر بیلدیره‌دیلر.
اولرنینگ ایتیشیچه، شهر سطحی‌ده پارتلش و انتحاری هجوم یوزبیرگنی دن سونگ، ساتیش‌لری کمیده 50 فایز کمه‌یگن و اوشبو واقعه اولرنی کته زیان بیلن دوچ قیلگن.
شهرنو نانوالریدن بیری محمدصفا‌نینگ ایتیشیچه، پارتلش دن آلدن هرکونده 2500 قرص نان ساته‌ریکن بیراق حاضرده اوشبو رقم 1200 گه کمه‌یگن.
اوشبو وضعیت کسبه‌کارلرنینگ اوستیده منفی تاثیر قویگن. کییم ساتووچیلردن بیری رامز‌نینگ ایتیشیچه، انه‌شوکونلرده 2 -3 مینگ افغانی‌دن کپراققه کییم ساته‌آلمیدی. اونینگ ایتیشیچه پارتلش‌لردن آلدن هرکونده 20 مینگ افغانی‌گه ساته‌ریکن.
عین‌حالده تیینچ‌اهالی یاده ساتیب آله‌دیگن‌لرنینگ ایتیشیچه، اوشبو وضعیتده اوی‌لریدن چیقیش‌گه جرات قیله آلمیدیلر.
ینگیلیده ترکیه‌دن قیتیب کیلگن پرویزنینگ ایتیشیچه، مملکتده کون اوتیش بیلن ناتیینچلیکلر کوپیشی سبب اونینگ عایله‌سی قیته‌دن چیت‌ایلیک مملکت‌لرگه یوباریشی نی ایسته‌یدی. پرویزنینگ ایتیشیچه، اهالی کوپینچه دهشت گه توشگن.
عین‌حالده صنعت و سوداگرلیک اتاقی سمی‌لری‌نینگ ایتیشیچه، کابل شهریده انتحاری و پارتلش هجوملر کوپیشی سبب مملکت خصوصی بولیم لری میلیونلرچه دالر زیان کورگن.
افغانستان صنعت و سوداگرلیک اتاقی‌نینگ سوزلاوچیسی صیام‌الدین پسرلی‌نینگ ایتیشیچه، بیرتاماندن اهالی‌نینگ حکومت گه بولگن اعتمادی کمه‌یگن و باشقه تاماندن پارتلش و ناتیینچلیکلر کوپیگن. اونینگ ایتیشیچه، وضعیت بوندی دوام تاپگن حالده افغانستان دن سرمایه‌نینگ قاچیشی‌گه شاهد بوله‌میز.
جناب پسرلی، حکومت دن تیینچ‌اهالی اینقسه خصوصی بولیم‌لر تیینچ‌لیگینی تامین‌لش توغریسیده توجه قیلیب سرمایه‌نینگ مملکت دن قاچیشی‌گه توسیق بولیشینی سوریدی.
عین‌حالده مملکت یاشلری، هردایم شهر یشاوچیلری پارتلش و انتحاری هجوملر سیسی نی یشیتمه‌سین‌لیگی اوچون هرییرده توپله‌نیب موسیقی سازلری نی چیرته‌دیلر.
اوشبو یاشلرنینگ ایتیشیچه، غم‌نینگ بغل قیلیش دردنی درمان قیلمه‌یدی؛ اهالی امیدسیز دیر و شادلیک خصوصیده فکرقیلیش اوچون نیازلری بار.
اوتکن هفته چهارشنبه کونی، طالبان گروهی کابل شهری‌نینگ 13- و 10- حوزه‌لری اوستیده هجوم ایتیب نیتجه ده 7 کیشی هلاک بولیب و باشقه 17 کیشی یره‌لندی، اوشبو هجوملر اهالی آره‌سیده دهشت نی تشله‌گن، مذکور هجومدن 6 کون اوتیش بیلن هم شهر ایسکی وضعیتی گه کیلگن ایمس.
