افغانستان ایچکی ایشلر وزیرلیگی نینگ بغلان اعتراضچیلرینی آگاهلنتیریشیچه، بوگون آقشامگهقدر کابل-شمال قتناو یولی ترافیک یوزیگه آچیلمهگن صورتده، پولیس کوچلری قتناو یولنی آچیش اوچون اقدام قیلهدی.
کابل-شمال قتناو یولی بغلان ولایتیده اوتکزیلگن نمایندهلر کینگشی سیلاوی نینگ سونگی نتیجهسی اعلان ایتیلگنیدن سونگ بیر ناراضیلیک نمایش نتیجهسیده اوتگن جمعه کونیدن بویان ترافیک یوزیگه توسیلگن. اعتراضچیلرنینگ ایتیشیچه، ایستکلریگه دقت قیلینگونگهقدر مذکور قتناو یول ترافیک یوزیگه آچیلمهیدی.
اوشبو اعتراضچیلر بغلان حوزهسیده اوتکزیلگن نمایندهلر کینگشی سیلاوی نینگ سونگی نتیجهسی قیتهدن سنهلیشینی ایستهگنلر. شونینگدیک، اولر حکومت دن محبوبالله غفاری قوییب یوباریلیشینی طلب قیلگنلر. جناب غفاری کمیده بیر آی آلدین باشقارهلاوچیلیک حکمی نتیجهسیده توتقونگه آلینگن و حاضر قماقخانهده دیر.
ایچکی ایشلر وزیرلیگی سوزلاوچیسی نصرت رحیمی نینگ ایتیشیچه، کابل-شمال قتناو یولی اعتراضچیلر تامانیدن توسیلیشی قانون گه قرشی و ناراضیلیک قاعدهسیگه ضد دیر.
اونینگ ایتیشیچه، اعتراضچیلرگه بوگون آقشامگهقدر مهلت بیریلگن و بو قتناو یول آقشامگهقدر آچیلمهگن صورتده، پولیس کوچلری آچیش اوچون اقدام قیلیشی ممکن.
