هلمند ولایتی نینگ یشاووچیلری، جمهور رییس تامانیدن هلمند ولایتی اوچون اپراتیفی وعلیماتی نماینده ایتیب تعیین لنگن عبدالجبار قهرمان نینگ اخیرگی وقتلرده سونگریان (سرنیزه) گروهی تشکیل ایتگن لیگیدن خواطر بیلدیرگنلر. اهالی‌گه کوره، اوشبو گروه داعش همده طالبلرنینگ ملارسول ناملی رهبری بیلن علاقه‌سی بار.
جمهور رییس غنی نینگ هلمند اوچون اوپراتیفی وعملیاتی نماینده‌سی همده نماینده‌لر مجلسی نینگ اعضاسی عبدالجبار قهرمان، بوندن بیر ییل آلدین مملکت ملی کوچلری چهار چوبه‌سیده طالبلر کیمیده بولگن گروه تشکیل ایتیلیشی‌نی تکلیف قیلگن لیگینی ایتگن.
بو توغریده جناب قهرمان‌نینگ سلام‌وطندارگه ایتیشیچه، بو تکلیفی جمهور رییس تامانیدن تصدیق بولگن. اهالی سنگوریان نام بیرگن مذکور گروه حاضر فعالیت قیله‌دی دیگن. اونینگ تعبیریچه، سونگریان اهالی تامانیدن بو گروهگه بیریلگن نام دیر. لیکن، بولر مملکت ملی خوفسیزلیک باشقرمه‌سی نینگ چهار چوبه‌سیده فعالیت قیله دیگن ملی امینت ملازملر دیر.
قهرمان نینگ سوزلریگه قره‌گنده، قوراللی طالبلر حاضر ایسه اوشبو گروه بدنام بولیشی اوچون اولگورگن. جنگریلر، تازه ایجاد بولگن بو گروه بیکار قیلینیشی اوچون میش – میش اویغاتگن دیدی قهرمان.
سونگریان ترکی سوز بولیب سرنیزه معنیسی‌ده ایشله‌تیله‌دی. بو ترکی سوز (دره سنگر) ناملی سریالدن آلینگن. مذکور سریال‌ده سونگریان ناملی گروه حربی عملیاتلرده اشتراک قیلیب، دایم مخالفلر بیلن اوروشده بوله‌دی. اوشبو سریال انچه مدت‌دن بیری افغانستان‌ده‌گی تلویزیون ترماقلردن نشر بوله‌دی.
مجلس نینگ مذکور اعضاسی اوشبو گروه فعالیتلرینی مهم دیب، سونگریان اخیرگی وقتلرده هلمند ولایتیده اساسی یوتوققه ایریشگنلر دیدی. بو حرکت ملی خوفسیزلیک اداره‌سی تامانیدن یخشی مدیریت ایتیلگن حالده، کیله‌جکلرده یخشی نتیجه آلیب کلیشی ممکن لیگی تاکید ایتیله‌دی. قهرمان، اهالی مذکور گروه بیلن قیین چیلیکلری بولگن حالده، توغریدن – توغری مساله باره‌سیده ملی امنیت اداره‌سیگه شکایت قیله آله دیلر دیگن.
بعضی بیر حربی تحلیلچیلرنینگ سوزلریگه کوره، افغانستان تورلی جنگری گروه‌لر بیلن چریکی اوروش‌گه روپه ره بولگن، ملی امنیت اداره‌سی تامانیدن بونده‌ی بیر حرکت ایجاد بولیشی ایجابی آدیم حسابلنه‌دی.
کابل خان تدبیر، فقط افغانستان ایمس، چریکی اوروش‌گه روپه ره بولیب تورگن قطار مملکتلرده بونده‌ی گروه‌لر ایجاد بولیب ملی کوچلر چهارچوبه سیده فعالیت قیله‌دی دیدی.
افغانستان ملی خفوسیزلیک اداره‌سی تامانیدن مذکور گروه مملکت نینگ باشقه ولایتلریده هم ایجاد بولیشی باره‌سیده بعضی بیر میش – میشلر بار.
