غزنی ولایتیده حیات کیچیرهدیگن بیر قنچه هندو و سیکلرگه دولت اعتبار بیرمهگنلیگی و بالهلری مکتبلرده قیناق آستیگه آلینگنلیگی باعث اوشبو ولایتده بولرنینگ ایکّی نسلی تعلیم و تربیهدن بحرهسیز قالیب نهایت سوادسیز تربیه لنگنلر.
غزنی بویلب هندولرگه قرهشلی عبادتگاهلردن بیریده کیچیک بیر صنف اختصاصلشتیریلگن. مذکور صنفده فقط هندو مذهبیگه عاید درس بیریلهدی. اما، بو صنفده درس کوره دیگن بالهلر ییریک آرزو همده یاروغ بیر کیلهجک اوچون اونچهلیک ایشانمی دیلر.
بو عبادتگاهده مذهب بوییچه تعلیمات کورگن بالهلر وایسبورون یاشلر، کیلهجکده مهندس، پیلوت و اقتصادچی بولیش آرزوسیده ایکن لیگینی تیلگه آلگنلر. بیراق، بو قبیل نیتلرگه ایریشیش حاضرگی امکانیت و شرایط بیلن ممکن ایمس لیگینی بیلدیرگنلر. سلاموطندار ترماغیگه صحبت بیرگن اوشبو بالهلردن بیر قنچهسی، دولت همده خصوصی مکتبلرده ناتوغری یاندهشیشلرگه روپه ره بولیش مجبوریتیدن مکتبلرگه باره آلمسلیکلرنی اظهار قیلگنلر.
بو بالهلردن بیری سنپال سنگ، دولت مکتبلریده اوقوچیلر آرقهلی قیناق آستیگه آلینیشیدن نالیدی: «نیمه اوچون مسلمان بولمی سیزلر و نیمه اوچون قرآن اوقیمی سیز.» غزنی ولایتیدهگی هندو وسیک یاشلرینینگ کیلهجکی توغریسیده خواطر بیلدیرگن سنگ، فقط مادی امکانیتگه ایگه سناقلی کیشیلر فرزندلرینی خصوصی مکتبلرده اوقیتهدی دیگن. هندو وسیک فرزندلری خصوصی مکتبلرده هم آمان – ده ایمس دیدی سنگ.
سنگ ناملی اوقیتووچی، کیچیک بیر اتاقده اوقوچیلرگه هندو مذهبیگه عاید درسلردن تعلیم بیریلهدی دیگن. موجود قورقینچ سبب بالهلر و اوقوچیلرگه کمدن – کم دولت مکتبلریگه باریب درس اوقیش اوچون رخصت بیره میز دیدی بو اوقیتووچی. شونینگدیک مذکور اوقیتووچی افغانستانده حیات کیچیرهدیگن هندو وسیکلر فرزندی حمایت بولیشی اوچون مملکت قانونیده معین بیر مورد قید ایتیلمهگن دیدی.
یاش – ییگیتلرینگیزنینگ سواد سویهسی قَی درجه ده دیگن سوراققه جواب بیرگن غزنی هندو وسیک یشاووچیلرینینگ نمایندهسی دلپ سنگ کوزی یاشگه تولیب، بوتون یاش – ییگیتلر هنوزگچه عادی متننی اوقیه آلمسلیکلرینی کویینیب تیلگه آلهدی. او، سابق نسل و کیلهجک نسل تعلیم و تربیهدن اوزاق قالگنلری قلبیمیزدهگی کته آغیریق دیدی.
جنابسنگ، بوندن آلدین هندولرنینگ سناقلی فرزندلری دولت مکتبلریده تعلیم کوریب، تحصیلگه دوام بیریش مقصدیده اروپایی دولتلرگه کیتگن لیکلرینی ایتهدی.
اوروشدن آلدینگی ییللر غزنیدهگی هندو و سیک بالهلری اوچون بیر قنچه مکتب قوریب بیریلگن؛ بیراق، مذکور مکتبلر طالبلر آرقهلی راکت هجومی آستیگه آلینگنی ایتیلهدی. غزنیدهگی هندو وسیکلر نمایندهسی، حاضر بالهلری قورقیشدن مکتب کیته آلمسلیگینی ایتهدی.
غزنی ولایتینینگ هندو وسیک فقراسی موجود قیینچیلیکلرینی اعتراف قیلگن ولایت معارف ادارهسی نینگ باشلیغی محمد عابد عابد، هندو سیک اوقوچیلر دولت مکتبلریگه یوباریلگن حالده، تعلیم و تربیه اوچون هیچ قندهی شرایطنی اییه مسلیکلرینی تیلگه آلگن. حساباتلرگه قرهگنده، غزنی ولایتیدهگی 500 هندو و سیک عایلهدن حاضرگه کیلیب 60 خانهدان قالگن لیگی معلوم بولهدی.
