افغانستان سنامجلسی زابلده اوغیرلنگن یوللاوچیلرنینگ قوییب یوباریلیشی خصوصیده، دقت قیلمهگن ادارهلر رسمیلری جزالهنیشینی سورهدی.
طالبلر اوچ کون آلدین غزنی تومنلری و کابل- قندهار قتناو یوللریدن اوغیرلهگن یوللاوچیلردن 7 کیشینینگ باشینی کیسگن.
طالبلرنینگ بو عملی پارلمان نمایندهلری و یشاوچیلر قرشیلیگیگه روپهره بولگنیدن کیین، اوتکن (سهشنبه کون) سناتورلر، مدنی فعاللر و سیاسی حزبلردن بیرقطاری اوشبو واقعهنی قارهلب، طالبلر اوتمیشلردن بویان گناهسیز یشاوچیلرنینگ قربانلیک قیلگنینی ایتیب و بو بیر مرته بیر خاص قومدن 7 کیشینینگ باشینی کیسیب، مملکت قوملری اورتهسیده قرهمه قرشیلیک وجودگه کیلتیریشینی تیلگه آلگنلر.
سنامجلسی بیرینچی اورین باسری محمدعلم ایزدیارنینگ ایتیشیچه، حکومت یشاوچیلر امنیتینی تأمینلش گه ناکام قالگن. جناب ایزدیارگه کوره، اوتکن نیچه آیده اوغیرلنگن یوللاوچیلرنی قوییب یوباره آلمهگن مسؤول ادارهلر حکومت تامانیدن جزالنیشی کیرهک.
جناب ایزدیارنینگ اورغولشیچه، حکومت بونقه واقعهلرنی باشقریش خصوصیده جدی شکلده ایشگه کیریشی لازم.
شونینگدیک سیاسی حزبلر و مدنی فعاللردن اونلرچهسینینگ کابلده اوتکزیلگن ییغینده ایتیشیچه، طالبلرنینگ، بو ایشیدن مقصد مملکت قوملری اورتهسیده اتفاقسیزلیک و قرهمه قرشیلیک ایجاد ایتیش دیر.
مدنی فعاللردن بیری نعیم نظرینینگ ایتیشیچه، طالبلر بو ایشی بیلن یالغیز بیر خاص قومنی هدف قرار بیرهدی. اونگه کوره، اوشبو قومی گروه حکومت اوچون قانیقرلی و طرفدار گروه بولگن؛ بیراق حکومت اولر اوچون هیچ ایش قیلمهگن.
مدنی فعاللردن باشقه بیری میثم احسانینینگ ایتیشیچه،« دشمن افغانستانده قومی اتفاقسیزلیکنی اورتهگه تشلب و قومی اوروشنی وجودگه کیلتیریش خصوصیده سعی و حرکت قیلهدی».
ایش و رواجلنتیریش حزب باشلیغی ذوالفقار امیدگه کوره، طالبلر بو ایشی بیلن اوزلرینی کته کورستهدی و حکومت ایچیدهگی تروریستلر اولرگه یاردم بیرهدی.
شونینگدیک مدنی فعاللر حکومت، بیرلشگن ملتلر تشکیلاتی، انسان حقوقلری کمیسیونی و باشقه ادارهلردن، 7 یوللاوچینینگ قاتلینی تانیب و جزالریگه ییتکزیشینی سورهدی.
باشقه تاماندن، افغانستان ملی امنیت کینگشی جمهور رییس ایکینچی اورین باسری سرور دانش، اجراییه ریاستی ایکینچی اورین باسری محمد محقق، قوم و قبایل وزیری محمدگلاب منگل و ترانسپورت وزیری محمدالله بتاشنی، زابلده باشی کیسیلگن قربانلیکلر عایلهلریگه ییتیشیش مسؤولی قیلیب تعیین ایتگن.
جمهور رییس سوزلاوچیسی اورین باسری سید ظفر هاشمینینگ بیر خبری ییغینده ایتیشیچه، امنیت کینگشی قراری اساسیده، یوللاوچیلرنینگ قوییب یوباریلیشیگه دقتسیزلیک قیلگن رسمیلر بو توغریده جواب بیرهدی.
