جمهورلیک ریاست سیلاوی نینگ یولگه قوییلیش زمانی یقینلنگن بیرچاغده، سمنگان ولایتی نینگ درۀصوفپایین تومنی و بادغیس نینگ قلعۀنو شهری گه طالبان گروهی هجوم قیلگن.
سلاموطندارگه صحبت بیرگن سمنگان ولایت کینگشی اورین باسری محمدهاشم بیان نینگ ایتیشیچه، اوتگن کیچه مذکور ولایت نینگ درۀصوفپایین تومنیده پولیس تشکیلاتینینگ عملیاتی قطعه کوچلری نینگ بیر پوستهسی اوستیگه طالبان هجوم قیلگن.
اونگه کوره، بو هجوم ده 5 پولیس هلاک و باشقه 6 پولیس یرهلنگن.
سمنگان ولایت کینگشی اورین باسرینینگ کوپهیتیریشیچه، اوتگن کون «پنجشنبه، 4- میزان» کیچ قورون طالبان درۀصوفپایین تومنی نینگ مرکزی گه هجوم قیلگن و حاضر هم امنیتی کوچلر و طالبان جنگریلری آرهسیده آتیشمه دوام ایتماقده.
اونگه کوره، مخابراتی ترماقلرنینگ فعالیتی کیسیلگنی باعث، اوشبو آتیشمه قربانلیگی توغریسیده توغری معلومات قولگه کیریتیلمهگن.
بیراق، سمنگان پولیس قومندانلیگی سوزلاوچیسی منیر رحیمی نینگ ایتیشیچه، مذکور تومن مرکزی گه طالبان تامانیدن اویوشتیریلگن هجوم دولتی کوچلر تامانیدن آرقه گه اوریلگن. اونینگ ایتیشیچه، دولتی کوچلرنینگ هوایی هجوملری نتیجهسیده 12 جنگری طالب هلاک و باشقه 10 جنگری طالب یرهلنگن. جناب منیر بو آتیشمهده حربیلرنینگ قربانلیگی توغریسیده هیچ نرسه دیمهگن.
سمنگان پولیس قومندانلیگی نینگ سوزلاوچیسی، مذکور ولایت یشاوچیلری اینیقسه درۀصوفپایین تومنی نینگ یشاوچیلری گه سیلاو کونیده خوفسیزلیک تأمینلنیشی اوچون امنیتی کوچلر بوتونلهی تیارگرلیک آلگنیدن ایشانچ بیریب و یشاوچیلر قورقمسدن سیلاوده اشتراک قیلیشلرینی بیلدیرگن.
جمهورلیک ریاست سیلاوی ایرته «شنبه، 6- میزان» مملکت بویلب یولگه قوییلهدی.
عین حالده، بادغیس پولیس قومندانی شریفالله چمتونینگ ایتیشیچه، اوتگن کیچه قلعۀنو شهری نینگ «تگاباسماعیل» منطقهسیده طالبان تامانیدن اویوشتیریلگن هجومده ملی خوفسیزلیک تشکیلاتی نینگ 737 قطعهسیدن 2 عسکر هلاک ایتیلگن.
اونگه کوره، مذکور قطعه گه تیگیشلی باشقه 2 عسکر یرهلنگن. بادغیس پولیس قومندانی نینگ ایتیشیچه، بو آتیشمهده طالبان هم قربانلیک بیرگن، بیراق حاضرگهقدر دقیق رقم قولگه کیریتیلمهگن.
طالبان گروهی حاضرگچه بو توغریده میدیالرگه هیچ نرسه دیمهگن.
شو توغریده…
یاماموتو: طالبان سیلاوگه خلقت ییتکیزووچی هرقندهی حرکتدن باش تارتیشی کیرهک
