د میدان وردګوولایت امنیه قومندان جنرال خلیل انداربي سلام وطندار ته وویل، چې نن سهار سلګونو وسله والو د جلرېز ولسوالۍ پر بېلا بېلو امنیتي پوستو بریدونه کړي دي.
قومندان انداربي د مرګ ژوبلې په اړه څه ونه ویل، خو زیاته یې کړه، چې اوس هم په سیمه کې د وسله والو طالبانو او افغان امنیتي ځواکونو تر منځ سخته نښته روانه ده.
خو د جلرېز ولسوال نقیب الله حیدري وايي، چې په دغه نښته کې یې وسله والو مخالفینو ته درنه مرګ ژوبه اړولې ده.
د حیدري په خبره په نښته کې ۱۱ وسله وال مخالفین وژل شوي او یو تن ژوندی نیولی شوی دی.
د حیدري په خبره په دغه جګړه کې ۵ پولیس وژل شوي او ۲ ټپیان شوي دي
حیدري همدا راز زیاته کړه، چې د وسله والو مخالفینو او امنیتي ځواکونو په نښته کې ۳ ملکیان هم وژل شوي او جګړه لا هم روانه ده.
بل لور ته د میدان وردګو د ولایتې شورا یو غړي محمد شریف هوتک سلام وطندارته وویل، چې وسله والو طالبانو د افغان ځواکونو ۹ امنیتي پوستې نیولي دي.
د هوتک په خبره په دغه نښته کې ملکې وګړو ته هم مرګ ژوبله اوښتي ده.
د میدان وردګو د ملکي روغتون ډاکټران وايي، چې تر اوسه د یو ملکي وګړي جسد روغتون ته ور وړل شوی دی.
هوتک وایي، که ولسوالۍ ته اضافي سرتېري ونه لېږل شي؛ نو دغه ولسوالي به د وسله والو طالبانو لاس ته ورشي.
د هوتک په خبره، د ولسوالۍ او مرکز تر منځ غځېدلې لاره هم تړل شوې ده.
تر اوسه د پېښې د مسولیت په اړه چا څه نه دي ویلي.
د یادونې ده، چې شاوخوا دوې اونۍ وړاندې د ۸۰۰ په شاوخوا وسله والو د لوګر ولایت په ازرې ولسوالۍ باندې هم وسله وال برید کړی و، خو د پرلپسې مقاومت له امله د امنیتي ځواکونو له خوا وتمبول شول.
