هرات ولایتی چشت شریف تومنی نینگ ایکّی کیلو مترلیگی و هرات شهری‌نینگ 176 کیلومتر اوزاقلیگیده جایلیشگن اینگ ییریک لایحه‌لردن بیری 633 میلیون مکعب سوو سیغیمیگه ایگه سوو توغانی افغانستان و هندوستان دولتلری‌نینگ دوستلیک رمزی. بو ییریک سوو توغانی 80 مینگ جریب ییرنی سوغاریش و 42 میگاوات برق ایشلب چیقاریش قابلیتی‌گه هم ایگه.
سلما سوو توغانی بوندن ییتی آی آلدین ینگی دهلی و کابل رهبرلری آرقه‌لی رسمن آچیب بیریلیب فایده‌له‌نیشگه تاپشیریلگن ایدی.
اما، اوشبو سوو توغانی اطراف حدودیده جایلشگن 40% ییرنی سوولنتیریش قابلیتی‌گه ایگه‌لیگی ایتیله‌دی. سلما سوو توغانی نینگ قوریلیش لایحه‌سی اساسیده ایکّی کانال بیری شمالی تامان و ایکّینچیسی جنوبی تامانده توزه‌تیلیشی نظرده توتیلگن ایدی. اوشبو توغان هرات ولایتی نینگ چشت، اوبه، پشتون زرغون، گذره، انجیل، زنده‌جان و غوریان تومنلریده 40% ییرنی سوولننتیریشی چمه‌لنگنی ایتیلگن.
حاضر سلما توغانی فایده‌له‌نیشگه تاپشیریلگندن کیین، سوو برق وزیری و هرات محلی مسووللری، مذکور ایکّی کانال توغان نینگ ایکّی تامانیده توزه‌تیلمی، 40 مینگ هکتارجریب ییر بو کانالر آرقه‌لی سوولنتیریلیشی ممکن ایمس لیگینی بیلدیرماقده‌لر.
سلما سوو توغانی هرات نینگ انجیل و گذره تومنلریده اره‌لیغیده جایلشگن. تومن نینگ ایکینچیلری سلام‌وطندارگه بیرگن صحبتده، سلما سووی ترقه‌تیب بیریلیشینی «عدالتلی» ایمس دیگنلر.
اولر، هنوزگچه ایکین ییرلرینی سوولنتیریش اوچون سلمانی توغانیدن فایده لنمه‌گن‌لیکلرینی ایتیب، کیله‌جکلرده هم بوندن فایده‌له‌نیشلری ممکن ایمس‌لیگینی بیلدیرگنلر. لیکن، باشقه بیر قنچه ایکینچیلر کیله‌جکلرده مذکور سوودن فایده له‌نیب ایکین ییرلرینی سوغاریش نیتلری یوق ایمس‌لیگینی تیلگه آلگنلر.
هرات ایکینچیلیک ریاستی عمومی لایحه‌لر مدیری عتیق‌الله رومل، توغانلر همده ایکین ییرلرگه سوو بیره دیگن شمالی و جنوبی ایکّی کانال قوریلمه گن حالده: «بو ریاست قوریق ییرلر سوولنتیریلیشی اوچون سوو بیریشی امکاندن اوزاق دیگن»
جناب رومل، بو ایکّی کانال‌نی قوریش افغانستان سوو برق وزیرلیگینی مسوولیتلریدن حسابلنه‌دی دیگن. هرات ایکینچیلیک اداره‌سی نینگ رسمیلری، حاضرگی کونده سلما توغانی نینگ سووی قنده‌ی ترقه‌تیب بیریلیشی اوستیده لایحه ایشلیب چیقاماقده ایکن لیکلرینی بیللی قیلگنلر.
لیکن، هرات ولایتیده مرغاب هریرود دینگیزی حوزهء عمومی اداره‌سی نینگ باشلیغی نوراحمد بارز، سلما سوو توغانی نینگ ایکّی تامانیدن ایکّی کانال قوریلیش لایحه‌سی بوندن 40 ییل آلدین دریاده‌گی سوو تاشقینلری نظرده توتیلگن حالده تاسیس بولیشی ریجه لنتیریلگن ایدی دیگن. اونینگ سوزلریگه کوره، حاضر ایسه یاغینگرچیلیک میزانی توشگنی همده دریاده‌گی سوو سطعی قویی کیتگن‌لیگی باعث حاضر ایکّی کانال قوریب، 40مینگ هکتار ییرنی سوولنتیریش امکاندن اوزاق .
سلام‌وطندار ترماغی‌گه صحبت بیرگن مملکت سوو برق وزیری علی احمد عثمانی، ییرنینگ هواسی اوزگریشی و سوو میزانی کمیگن‌لیگی اوشبو ایکّی کانال قوریلمس لیگی نینگ اساسی عامللریدن سنه‌له‌دی دیگن. جناب عثمانی، سلما سوو توغانی قوریلیشیدن اساسی مقصد افغانستان تاغلریدن آقه دیگن سوولر قوشنی ممکتلرگه هدر کیتیشی نینگ آلدینی آلیش دیگن.
بو قیین چیلیکلر نظرده توتیلگن حالده، حاضر سلما توغانی 35 مینگ هکتار ییرنی سوولنیتریش سیغیمیه‌گه ایگه‌لیگی ایتیله‌دی.
سلمان سوو توغانی قوریلیشی افغانستان نینگ بیرینچی جمهور رییسی محمد داوودخان دولتی نینگ ییریک لایحه‌لریدن بولگن. بو توغان نینگ ایشی 1976- ییلده هند همکارلیگی بیلن باشلگن. توغاننی قوریش ایشی مملکتده یوز بیرگن ایچکی اوروشلر سبب توخته‌تیب قوییلگندن کیین میلادی 2005- ییلده لایحه نینگ ایشی قیته‌دن باشلندی.
سلما سوو توغانی 20 کیلو متر اوزونلیک و 3 کیلیو متر اینیده قوریلگن. بو توغانده 640 میلیون متر معکب سوو سیغیشی مول‌جللنگن. بو توغان 9 آیدن 12 آیگه قدر بوتونلی سووگه تولیشی تخمین ایتیلگن. سلما سوو توغانی هندوستان حکومتی نینگ افغانستان دولتیگه قوریب بیرگن بی بها اولکن لایحه‌لریدن سنله‌دی.
