په سرپل کې محلي مسوولان د دغه ولایت په سانچارک او سوزمهکلا ولسوالیو کې د طالبانو د بریدونو له کبله د ۱۱ امنیتي سرتېرو د وژل کېدو خبر ورکوي.
د سرپل د والي ویاند ذبېحالله اماني سلاموطندار ته ویلي چې یاد سرتېري چې ملي او محلي پولیس او دغه راز ولسي پاڅونوال وو، وژل شوي دي.
د نوموړي په وینا، په دغو بریدونو کې ۱۹ نور امنیتي سرتېري ټپیان شوي دي.
د سرپل د ولایتي شورا مرستیال سیداسدالله دانش وایي، د دغه ولایت پر سانچارک ولسوالي د طالبانو په برید کې د محمدعلي چمران په نوم د محلي پولیسو د قوماندان په ګډون ۸ سرتېري وژل شوي او ۸ نور ټپیان دي.
د نوموړي په وینا، د دغه ولایت پر سوزمهکلا ولسوالي د طالبانو په برید کې ۳ محلي پولیس وژل شوي او ۶ نور له ۴ ملي پولیسو سره ټپیان دي. هغه وايي، طالبانو د یادو ځواکونو ټولې وسلې او تجهیزات هم له ځانه سره وړي دي.
دانش زیاتوي، د امنیتي ځواکونو او طالبانو ترمنځ نښتې د شپې په یوه بجه پیل او تر سهاره یې دوام وکړ.
دا په داسې حال کې ده چې طالبانو بېګاه په لوګر کې د مس عینک کان د امنیتي ځواکونو پر پوستې هم برید کړی او ۸ پولیس یې وژلي دي.
طالبانو تر اوسه د دغو نښتو په اړه څه نه دي ویلي.
