د افغانستان د ساداتو د سولې شورا وسله والو طالبانو او د افغان حکومت ټولو مخالفو وسله والو ډلو ته خبرداری ورکوي، چې که په درېيو میاشتو کې دننه جګړه و نه دروي، نو پر ضد به يې میلیوني پاڅون وکړي.
د افغانستان د ساداتو د سولې شورا غړي د پنجشنبې په ورځ(اکټوبر۲۷مه) کابل کې د افغانستان ټولو قومونو او یووالي په موخه راټول شوي وو.
د یادې شورا غړو په یوه غږ غوښتنه وکړه، چې نور د وینې توېیدو زغم نه لري او د وسله والو طالبانو په ګډون له ټولو ښکېلو خواو غواړي چې روانې جګړې ته د پای ټکی کیږدي.
د افغانستان د ساداتو د سولې شورا مشر سید پاچا حسیني وايي، چې په هېواد کې د ساداتو شمېر نږدې ۳ میلیونه ته رسیږي او دا شمېر وګړي دولت او هم وسله والو مخالفینو ته خبرداری ورکوي، چې که تر راتلونکو ۳ میاشتو پورې دې وسله والې نښتې ته د پای ټکی کې نه ږدي دوی به يې پرضد پاڅون وکړي.
په همدې حال کې پخوانی طالب چارواکی ملا عبدالسلام ضعیف وايي، چې د افغانستان ټول قومونه دې د ساداتو قوم په څېر خپل غږ پورته کړي او جګړې ته دې نه ووايي.
ضعیف وايي، د جګړې اصلي لامل محرومیت دی، نو ځکه خو اړینه ده چې د ولس هر ډول محرومیت لرې کړی شي.
سلام ضعیف زیاتوي، ټول هغه لاملونه چې جګړه اوږدوي لومړی باید په نښه او وروسته د ځانګړي پروګرام له مخې دې ۴۰ کلنې جګړې ته د پای ټکی کیښودل شي.
د افغانستان د ساداتو شورا پر ۱۳۷۱ لمریز کال فعالیت پيل کړی او اوس هم په ډيرو ولایتونو کې څانګې لري.
