زعفران یا-ده قیزیل آلتین، نیچه ییلدن بویان افغانستانده کوکنار ایکینی اوچون مناسب بدیل تانیلگن؛ بیراق سونگی کونلرده هرات ولایتینینگ زعفرانچیلری مملکت بازارلریده زعفران بهاسی تکرارسیز شکلده کمهیگنیدن شکایت قیلماقدهلر.
اولرنینگ ایشانچی گه کوره، اوشبو اوسیملیک استه-سیکین ایکینچیلرنینگ آرهسیده هم ارزشینی قولدن بیرماقده.
زعفرانچیلردن بیرقطارینینگ آگاهلنتیریشیچه، حکومت زعفران بهاسی کوپهییشی توغریسیده چاره تدبیر کورمهگن صورتده، اولر قیتهدن کوکنار ایکیشگه باشلهیدیلر.
اولرگه کوره، ایکی ییل آلدین بیر کیلو زعفراننینگ بهاسی 100 مینگ افغانیدن آرتیق ایکن؛ بیراق بو ییل بو اوسیملیکنی بیر کیلوسی 28 مینگ افغانی گه کمهیگن.
اولرنینگ ایتیشیچه، حکومت بو موضوع گه دقت قیلمهگن صورتده، ایکینچیلر قیتهدن کوکنار ایکهدیلر؛ چونکه زعفران بهاسینی حاضرگی وضعیتی گه قرهگنده، کوکنار بهاسی نیچه برابر بولهدی.
هرات ولایتیده زعفرانچیلر بیرلیگینی باشلیغی بشیراحمد رشیدینینگ ایتیشیچه، زعفران بهاسی دنیا بازارلریگه یخشی بیر شکلده صادر ایتیلمهگنی باعث، کمهیگن.
او، زعفران ترقهتیش و بستهبندلیگی توغریسیده حکومتنینگ سعی و حرکتلرینی ییترلی ایمس دیب اورغولشیچه، هرات زعفرانینینگ بازاری حکومت تامانیدن جدی شکلده نظارت قیلینیشی کیرهک.
هرات ولایتینینگ ایکینچیلیک ریاستینی حسابات آمری عتیقالله رومل، زعفران قیمتی بیردیکلیگینی تَن آلیب ایتیشیچه، حکومت و زعفران شرکتلری منطقهنینگ بویوک مملکتلری بیلن شرطنامه باغلب زعفران بهاسینی یوقاری کوتریش اوچون سعی و حرکت قیلهدیلر.
افغانستانده جاری ییل 13 مینگ کیلوگرام زعفران ایشلب چیقاریلگن و بونی 95 فایزدن آرتیغی هرات ولایتیدن قولگه کیلگن.
