بوگون کابل ریکانینگ ایکینچی کون اولتیریشی‌گه میزبان‌لیک قیلدی. اوشبو اولتیریشده اشتراک ایتکن مملکت‌لر، دنیا بویلب اقتصادی بازارلرده افغانستان باغله‌نیشی توغری‌سیده بولگن برنامه‌لری اوستی‌گه صحبت‌لشگن. مملکت جمهور رییسی‌نینگ اوشبو اولتیریشده ایتیشیچه، ملی بیرلیک حکومت اداری فسادگه توسیق بوله‌دی و سرمایه یاتقزوچی مملکت‌لر ایشانچ بیلن ایریم بولیم‌لرگه سرمایه یاتقیزه‌آله‌دی.
جمهور رییس غنی‌نینگ کوپه‌یتیریشیچه، مملکت تدارکاتی تیزیمی عیب‌سیز سیستم‌گه اوزگرگن و اداری فسادنی بوتونله‌ی باشقریش‌گه قادر بولگن. اونینگ، اوشبو اولتیریشده اشتراک ایتکن مملکت‌لرگه ایتیشیچه، افغانستان قشاق مملکت ایمس و آسیانی دنیا مملکت‌لری بیلن باغله‌یدیگن نطقه سنله‌دی.
جمهور رییس، آسیا مملکت‌لریدن موجود قیین‌چیلیک لرنی تانیشی و اوندن کیین ییچیمی خصوصیده یول قیدیریشینی سوره‌دی. جناب غنی‌گه کوره، آسیا اقتصادی کینگه‌ییش جریانیده و بوندن کوره یخشی‌لنیشی خصوصیده هر تامانلمه سعی و حرکت قیلیش لازم.
شونینگ‌دیک، مملکت تشقی ایشلر وزیری صلاح الدین ربانی ایکینچی اولتیریشده سوزگه چیقدی. اونینگ ایتیشیچه، بوندن کیین افغانستان‌گه بیریله‌دیگن دنیا یاردم‌لری بیر تامانلمه بولمه‌یدی، چونکه افغانستان یاردم بیرمه‌گن صورتده، آسیا مملکت‌لری اقتصاد یوکسلیشی‌گه قول تاپه‌آلمه‌یدی. جناب ربانی‌نینگ ایتیشیچه، حاضر افغانستان، دنیا بیلن آسیانی اقتصادی مرکزی‌گه اوزگرگن.
انه شونده‌ی، ترکمنستان سالیق وزیری محمدعلی محمدف‌نینگ بو اولتیریشده ایتیشیچه، آسیانی کوچلی کیلیم و کیتیم چیزیققه احتیاجی بار و بو چیزیق مملکت‌لر اوزگریشی اوستی‌گه ایجابی تأثیر تشله‌یدی. جناب محمدف‌گه کوره، ترکمنستان هردایم منطقه‌یی قره‌مه قرشی‌لیک‌لرگه طرف‌سیز بولگن، دنیا و آسیایی مملکت‌لر اوشبو مملکت طرف‌سیزلیگی‌دن ایش آلیشی کیره‌ک. اونینگ کوپه‌یتیریشیچه، تینچ‌لیک تأمین‌لش استانبول لایحه‌سیده اولرنینگ اونملی لایحه‌لریدن بیری بولگن. جناب محمدف‌نینگ ایسلشیچه، مملکتی افغانستان برابریده آچیق موضوع بیلن حرکت قیلگن.
او، بو اولتیریشده، میلادی 2017- ییل 7- ریکانینگ ترکمنستان تامانیدن میزبان‌لیک بولیشینی سوره‌دی. محمدف‌گه کوره، ترکمنستان هردایم انرژی و برق بولیمی‌گه یاردم بیریب کیلگن و حاضر اوشبو مملکت منطقه‌یی موضوع‌لر خصوصیده یاردم بیریش‌گه تیارگرلیک آلگن.
آلتینچی ریکا اشتراک‌چیلریدن بیری هند بولگن. مذکور مملکت تشقی ایشلر وزیرلیگی رسمی‌لریدن بیری سجاتا مهاتانینگ بو اولتیریشده ایتیشیچه، ترانزیت افغانستان بیلن منطقه مملکت‌لری‌نینگ باغله‌نیشی‌گه سبب بوله‌دی.
خانم مهاتانینگ ایتیشیچه، بیشینچی ریکا ییغینی‌ده بحث‌گه آلینگن لایحه‌لر میلیاردلرچه دالر خرجت کوتره‌دی و اوشبو سرمایه یاتقزیش‌لر منبع‌سی تعیین‌لنیشی لازم. هند تشقی ایشلر وزیرلیگی اوشبو ییریک ملازمی‌نینگ ایتیشیچه، افغانستان خلقی‌نینگ بوندن آرتیق کوتمس‌لیگی کیره‌ک و باشقه بیر ییل ایچیده اوشبو لایحه‌لر آرقه‌لی اولرگه ایش زمینه‌سی یره‌تیلیشی لازم.
خانم مهاتا، مملکت ده‌گی جاری ناتینچ‌لیک‌لر و منطقه‌ده عصیانچیلیک یوکسلگنی توغری‌سیده اشاره قیلیب اورغولشیچه، موجود تهدیدلرگه قره‌گنده افغانستان‌نی منطقه بیلن باغله‌نیشی قیین بولگن.
اوشبو اولتیریشده شونینگ‌دیک، ایران ایچکی ایشلر وزیری عبدالرضا رحمان فضلی سوزگه چیقدی. جناب فضلی‌گه کوره، ایران تیل، تاریخ و دینی جهتدن افغانستان بیلن بیرگه بولگن. ایران‌نینگ ایچکی ایشلر وزیری‌گه کوره، میلادی 2001- ییل‌دن کیین ایکی مملکت علاقه‌سی جوده‌هم یخشی بولگن. جناب فضلی‌نینگ اوغولشیچه، ایران، افغانستان‌ده تینچ‌لیک تأمین‌لنیشی‌نی ایسته‌یدی. شونینگ‌دیک اونینگ ایتیشیچه، ایران هردایم منطقه مملکت‌لری بیلن بیرگه افغانستان‌نی دنیا بازارلری بیلن باغله‌نیشی خصوصیده سعی و حرکت قیلگن.
فضلی‌نینگ کوپه‌یتیریشیچه، ایران بیلن 5+1 مملکت‌لری اورته‌سیده‌گی هسته‌یی کیلیشووی منطقه مملکت‌لری و افغانستان علاقه‌سی یخشی صورتده باشله‌نیشی دیر. شونینگ‌دیک اونینگ ایتیشیچه، ایران یخشی شرایط‌ده بولیب منطقه و افغانستان‌ده سوداگرلیک یوکسلیشی خصوصیده هر تامانلمه یاردم بیریش‌گه تیار دیر. اونگه کوره، افغانستان‌نی مرکزی آسیا بیلن باغله‌نیش رویاسی چابهار بندری آرقه‌لی نتیجه بیرماقده.
هند، مذکور بندر توزه‌لیشی خصوصیده اون ییل اوچون 85 میلیون دالر سرمایه یاتقیزه‌دی. اوشبو بندر آرقه‌لی افغانستان بیلن منطقه اقتصادی باغلنه‌دی و زمان اوتیشی بیلن امنیت تأمین‌لنیشی‌گه سبب بوله‌دی. ایران ایچکی ایشلر وزیری‌نینگ ایتیشیچه، مذکور بندر افغانستان‌نی هند اقیانوسی و عمان بحیره‌سی بیلن باغله‌یدی و خرجتی‌هم آز بوله‌دی.
شونینگ‌دیک او، خاف- هرات تیمیر یولی کینگه‌ییشی‌دن ایسلب ایتیشیچه، اوشبو تیمیر یول توزه‌لگن صورتده، افغانستان، منطقه مملکت‌لری‌گه یقین‌لشه‌دی. اوشبو تیمیر یول تورت بولیم‌دن عبارت بولگن، اوچ بولیمی 138 کیلومتر بولیب ایران تامانیدن توزه‌له‌دی و بیر بولیمی 141 کیلیومتر بولیب افغانستان تامانیدن توزه‌له‌دی. اوشبو تیمیر یول‌دن آیی‌ده 800 مینگ تُن بار انتقال بیریله‌دی و 8500 یوللاوچی جایلشه‌دی.
پاکستان باش وزیری‌نینگ ملی امنیت و تشقی ایشلر بوییچه ییریک مصلحتچیسی سرتاج عزیز، اوشبو اولتیریشده مذکور مملکت‌نینگ منطقه اقتصادی خصوصیده‌گی ایشلریدن ایسله‌دی. جناب عزیزنینگ ایتیشیچه، پاکستان هردایم «استانبول لایحه‌سی» اساسیده فعالیت قیلیب کیلگن. اونگه کوره، پاکستان کوپینچه فعالیت‌لری‌نی تیمیریول و انرژی بولیم‌لریگه عمل‌گه آشیرگن.
شونینگ‌دیک عزیزنینگ کوپه‌یتیریشیچه، پاکستان، افغانستان لایحه‌لری‌گه یاردم بیریش خصوصیده تیاردیر. اونینگ کوپه‌یتیریشیچه، مملکتی منطقه اقتصادی همکارلیک‌لری‌گه کوپراق سهمیه آلیش اوچون «دی. آر. آر» کنوانسیونی‌گه عضو بولگن.
اوشبو ایکی کون‌لیک اولتیریشده، 30 مملکت و 40 خلق ارا تشکیلات نماینده‌لری اشتراک ایتکن. ریکانی بیرینچی اولتیریشی میلادی 2005- ییل کابل‌ده اوتکزیلدی و اوندن کیین میلادی 2016-، 2009-، 2011-، و 2012- ییل‌لرده ینگی دهلی، اسلام آباد، استانبول و دوشنبه‌ده اوتکزیلدی.
