روسیه‌نینگ افغانستان‌ده‌گی ایلچی‌سی الکساندر مانتیتسکی، مملکتی‌نینگ افغانستان‌ده‌گی مخصوص نماینده‌سی ضمیر کابل‌وف‌نینگ اخیرگی اظهاراتی خطا تعبیر ایتیلگن دیگن. اونگه کوره، کابل مدیاسی‌ده ترقه‌تیلگن مساله اونینگ سوزلریدن کیلیب چیقمیدی.
کابل‌وف اوتگن پنج‌شنبه کون خارجی بیر مدیا بیلن قیلگن صحبت‌ده داعش‌گه قرشی روسیه و طالب‌لر تامانیدن آلیب باریله‌دیگن اوروش‌نی اوخشش‌لیگی بار دیگن ایدی. انه شو سبب افغانستان دولتی بیلن طالب‌لر اورته‌سیده‌گی معمانی حل قیلیش اوچون سیاسی یول قدیریلیشی لازم دیگن ایدی ضمیرکابل‌وف. شونینگ‌دیک جناب کابل‌وف، داعش‌گه قرشی اوروش آلیب باریش‌ده طالب‌لر بیلن روسیه‌نی قوشمه منفعتی بارلیگنی بیلدیرگن.
جناب کابل‌وف بو بارده کوپراق ملومات بیرمسدن، رسمی مسکو طالب‌لر بیلن هماهنگ‌لیک‌ده معلومات تیارلش اوچون بیر ترماق قوریلیشی‌نی ایتگن ایدی.
عین حالده، افغانستان عاموی اخبارات واسطه‌لری کابل‌وف‌گه اساسلب تیارله‌گن گزارش‌لرده، روسیه قورال‌لی طالب‌لر بیلن علاقه قوریش‌گه حرکت قیلگنی معلوم ایتیلگن ایدی. بو خبر ایسه ملی مجلس نماینده‌لری‌نینگ عکس‌العملی‌گه روبه‌ره بولدی.
شونینگ‌دیک اوتگن کون (یکشنبه) «سندی تایمیز» کونده‌لیگی‌نینگ یازگن بیر گزارشی‌ده، روسیه جمهور رییسی ولایدمیر پوتین و طالب‌لر رهبری ملا اخترمحمد منصور تاجیکستان‌ده اوچره‌شگنی قید ایتیلگن. اوچره‌شووده داعش‌گه قرشی قوشمه کوره‌شیش مساله‌سی محاکمه ایتیلگن.
تشقی ایش‌لر وزیرلیگی روسیه‌نینگ افغانستان‌ده‌گی مخصوص نماینده‌سی سوزلریگه اساسلب ترقتگن گزارش‌ده، روسیه ایلچی‌سی مملکتی ایرکین و آزاد افغانستان وجودگه کیلیشی اوچون سعی وحرکت قیله‌دی دیگن.
