قطرنینگ دوحه شهریده آمریکا نماینده‌سی و طالبان گروهی آره‌سیده 6 کونلیک سوزلشوولر اوتکزیلگنیدن سونگ، میلادی جاری آی‌نینگ 5- و 6- کونلریده «افغانستانلیک‌لر ارا دیالوگ» نامی‌ده یولگه قوییله‌دیگن تینچلیک ییغینی گه روسیه میزبانلیک قیله‌دی.
گزارشلر اساسیده، اوشبو ییغینده سابق جمهور رئیس حامد کرزی، اجراییه ریاستی‌نی ایکینچی اورین باسری حاجی محمد محقق، جهادی رهبر محمداسماعیل خان، جمعیت حزبی‌نینگ اجراییه باشلیغی عطامحمد نور و عباس استانکزی رهبرلیگی‌ده طالبان گروهی‌نینگ هیأتی اشتراک قیلیشی خصوصیده قرار قیلینگن. افغانستان حکومتی بو ییغینده اشتراک قیلمه‌سینی بیلدیرگن.
طالبان گروهی‌نینگ سابق رسمی‌لری و سیاسی ایش بیلرمانلردن بیرقطاری‌نینگ ایشانچی گه کوره، روس‌لر بونده‌ی ییغین‌لرنی یولگه قوییب اوز سیاسی منفعت‌لرینی ایزله‌یدی.
سلام‌وطندارگه صحبت بیرگن طالبان گروهی‌نی سابق رسمی‌لریدن بیری سیداکبرآغانینگ ایتیشیچه، افغانستاندن آمریکا کوچلری‌نینگ چیقیش خبری منطقه مملکت‌لری‌نینگ اره‌لشووی گه زمینه یره‌تگن و بو مملکت‌لر افغانستان گه تیگیشلی مسئله‌لرگه اره‌لشیش اوچون سعی و حرکت قیله‌دی.
اونگه کوره، مسکو ییغینی افغانستان تینچلگی تأمین‌لنیشی خصوصیده، هیچ قنده‌ی تأثیر قویمه‌یدی.
شو توغریده…
- دوحه ییغینی؛ تینچلیک سوزلشوولرینی نتیجه‌سی نامعلوم دیر
دوحه ییغینیده افغانستان‌نینگ 17 ییل‌لیک اوروشی یکونله‌نیشی اوستیگه کیلیشیلدی
قطر تینچلیک سوزلشوولری؛ طالبلر خلق ارا کفالت طلب قیلگن
طالبان گروهی‌نینگ اوشبو سابق ملازمی‌نی کوپه‌یتیریشیچه، مسکو ییغینیده وقتینچه‌لیک اداره قوریلیشی و مملکت سیاسی شخصیت‌لریدن بیرقطاری وقتینچه‌لیک حکومت‌گه کیریتیلیشی خصوصیده صحبت قیلینیشی ممکن.
سیاسی ایش بیلرمانلردن بیری اسحاق اتمرنینگ ایتیشیچه، روس‌لر تینچلیک سوزلشوولری آرقه‌لی آمریکا بیلن روپه‌ره بولیش‌نی ایسته‌گن صورتده، منطقه و افغانستانده ینگی توقنه‌شوولر زمینهسی یره‌تیله‌دی.
عین‌حالده، کابل‌ده روسیه ایلچی‌خانه‌سی بیر خبرنامه ترقه‌تیب ایتیشیچه، مسکو ییغینی افغانستان یشاوچیلری تامانیدن یولگه قوییله‌دی و روسیه یالغیز بو ییغین‌گه زمینه یره‌ته‌دی.
