د حکومت اجرایوي ریاست وايي، چې یو ځل بیا په ټاکنو کې د زړو کارتونو استعمال به دوی ته د منلو وړ نهوي، ځکه د دوی پر وینا، دغه کار به هېواد له ګډوډيو سره مخ کړي.
د اجرایه ریاست ویاند ددغه مطلب په څرګندولو سره زیاته کړه، د ټاکنیزو کمېسیونو چارواکي باید د ځانګړي سمون کمیسیون سره سم خپلې چارې پرمخ یوسي.
د اجرایه رییس ویاند مجیبالرحمان رحیمي نن کابل کې خبري غونډې ته وویل، چې د ټاکنو اوسنی کمېسیون باید د ټاکنیز سمون ټولګې له مخې کار وکړي او د دغه کمېسیون په نویو پریکړو کې هم د حکومت، مدني ټولنې او د ټاکنو څار بنسټونو نظرونه واخلي.
د هغه پر خبره، په تېرو ټاکنو کې د افغانستان د نفوس په پرتله زیات کارتونه ویشل شوي دي.
هغه وايي، چې د ټاکنو خپلواک کمېسیون دارالانشا مشر پر ټاکنه کار روان دی او حکومت هڅه کوي څو داسې یو څوک پردې دنده وګومارل شي چې د ټاکنو کمیسیون پخوانیو غړو سره هېڅ راز اړیکه و نهلري او خلکو ته د منلو وي.
هغه وویل: "موږ باور لرو چې د ښه نوم خاوند داسې کس چې د ټاکنو کمېسیون له پخوانیو چارواکو سره اړیکه و نهلري ریښتنی وي او وړتیا يې خلکو ته څرګنده وي د دالانشا ریاست ته به ور وپيژندل شي".
د اجرایه ریاست چارواکو پروینا، د ټاکنو کمېسیون له پخوانيو غړو افغانستان ترخه تجربه لري او حکومت هڅه کوي، چې یو ځل بیا پر دغو کمیسیونونو د خلکو باور زیات کړي.
