د ګلبدین حکمتیار په مشرۍ د حزب اسلامي استازي وايي، په راتلوونکې اوونۍ کې به ۶۹ هغه زندانیان له بنده ازاد کړای شي، چې پر دوی پورې تړلې دي.
د یاد حزب ویاند حشمتالله راشد سلاموطندار ته د پورته ویناوو د څرګندولو ترڅنګ زیاته کړه، چې په دې سره به د حکومت او حزب اسلامي ترمنځ د سولې د شوي هوکړهلیک په اړه راپورته شوی کړکیچ هم پای ته ورسيږي.
راشد زیاتوي د حزب اسلامي رهبر ګلبدین حکمتیار په افغانستان کې دی او د بندیانو د ازادولو لړۍ پیلېدو سره به په ځانګړو مراسمو د خلکو منځ کې را ښکاره شي.
دا په داسې حال کې ده چې د حزب اسلامي سره د سولې په شوې هوکړې د عملي کېدو په برخه کې د ملي وحدت حکومت تر راتلونکو ۱۵ ورځو وخت ورکړی دی.
حکومت ویلي، چې دوی په تمه دي، څو کابل ته د حکمتیار د راننوتلو په اړه ددې حزب له اړخه اعلان وشي.
د حزب اسلامي او حکومت ترمنځ د سولې د هوکړې پر تطبیق د کمېسيون ویاند احمدفرزام وايي، حزب اسلامي د سولې د کړې هوکړې ځینې برخې لکه نظامي فعالیتونه او جګړه پای ته رسول عملي کړي او کابل ته د حکمتیار د راتګ سره به ټولې ژمنې په دې برخه کې عملي شي.
"هر بندي ته دوه تضمین خطونه ورکول کيږي یو د حزب اسلامي د رهبرۍ له خوا چې هر زنداني دهغوی پورې تړاو ولري هغه به اساسي قانون، ټولو نافذه قوانينو او د سولې هوکړې ته ژمن پاتې کيږي، یو تضمین لیک د هغې سیمې د مشرانو او یو هم په خپله د زنداني له خوا یو ژمن لیک ورکول کيږي."
د حکومت او حزب اسلامي ترمنځ د سولې هوکړه لیک تیر کال په ۳ فصلونو او ۲۵مادو کې امضا شوی و چې ددې هوکړې له مخې د اساسي قانون په منلو سره به د حکومت پر وړاندې له وسله والې جګړې لاس اخلي.
