د کرنې، اوبولګولو او مالدارۍ وزارت نن د «زرغونول او سوله» تر شعار لاندې د نیالګیو کېنولو کمپاین د کابل په بادام باغ کې پیل کړ.
د کرنې وزارت د طبیعي سرچینو رییس رفېع قاضيزاده وایي، د نیالګیو کېنولو او نیالګیو وېشلو دغه کمپیان د هېواد زرغونولو په موخه پیل شوی دی.
د قاضيزاده په وینا، دوی سږ کال شاوخوا ۲ میلیونه او همکارو بنسټونو یې له ۲۰ میلیونه ډېر نیالګي چمتو کړي دي.
د کرنې وزیر نصیراحمد دراني د دغه کمپیان د پیل پر مهال وویل چې دا به د هېواد په زرغونولو او د هوا ککړتیا په راکمولو کې مهم ګام وي.
د کرنې وزیر د کابل شنه کمربند پروګرام په اړه وویل چې دغه لس کلن پروګرام پر لس زره هکټاره ځمکه د نیالګیو کېنولو په موخه طرح شوی چې سږ یې دویم کال دی.
د دراني په وینا، تر اوسه د کابل ښار د بېلابېلو سیمو پر ۱۵۸۸ هکټاره ځمکه ۵۲۴ زره نیالګي کېنول شوي دي.
په همدې حال کې اجرایوي رییس عبدالله عبدالله چې دغه کمپاین ته ورغلی و وايی، د ملي یووالي حکومت د تېرو حکومتونو په پرتله کرنې ته ډېر پام اړولی او په دې برخه کې زیاته پانګونه شوې ده.
د کرنې وزارت هر کال د نیالګیو کېنولو په موخه پروګرامونه جوړوي، خو د اندېښنې خبره دا ده چې د کېنول شویو ونو سمه ساتنه نه کېږي.
