د ټولګټو وزارت مسوولانو نن په کابل کې د خبري غونډې پرمهال له خصوصي شرکتونو سره د ۱۳۰ میلیونو افغانیو په ارزښت د سالنګ لویې لارې د بیارغونې او د تخار اشکمش ولسوالۍ د پُل رغولو پروژو تړونونه لاسلیک کړل.
د ټولګتو وزیر یما یاري غونډې ته وویل چې د دغو تړونونو لهمخې به د ۱۲۳ میلیونو افغانیو په ارزښت د سالنګ لویې لاری شاوخوا ۱۰ کیلومتره سرک په بېړني ډول ورغول شي او دغه راز به د تخار په اشکمش ولسوالۍ کې د ۸ میلیونو افغانیو په ارزښت د ۳۰ مترو په اوږدوالي یو پُل ورغول شي.
ښاغلي یاري زیاته کړه، تخار ولایت کې د پله چارې به په شپږو میاشتو کې بشپړې او د سالنګ لویې لارې بیارغونې چارې به هم له ژمي مخکې بشپړې شي.
د ټولګټو وزیر په وینا، د سالنګ د لویې لارې د رغونې دویمه او درېیمه برخه هم په تدارکاتی پړاونو کې ده چې د پړوانو له بشپړولو وروسته به یې ډېر ژر د رغونې تړونونه لاسلیک او چارې پیل شي.
