.jpg)
د ملګرو ملتونو د کډوالۍ ادارې مسوولان وايي، وچکالۍ او جګړې د کورنیو بېځایه شویو او کډوالو شمېر زیات کړی دی.
د دې ادارې لوړپوړیو چارواکيو چې د بېځایه شویو او کډوالو د وضعیت ارزولو لهپاره په دوه ورځني سفر افغانستان ته راغلي وو، نن یې خپلې موندنې له رسنیو سره شریکې کړې. دغه چارواکي وايي چې بېځایه شوي او کډوال د بشرپالنې ډېرو مرستو ته اړتیا لري.
په بېړنیو حالاتو کې د کډوالۍ بنسټ د بشري مرستو همغږی کوونکی مارک لاوکاک وايي، ناامني، د پراختیايي پروژو کموالی او وچکالي په افغانستان کې د بېځایه کېدو او کډوالۍ اصلي لاملونه دي.
نوموړی ټینګار کوي چې له پاکستان، اېران او نورو هېوادونو نه د افغان کډوالو بېرته راتګ باید په خپله خوښه وشي.
د لاوکاک په وینا، افغان دولت د بېځایه شویو او کډوالو لهپاره ښې تګلارې جوړې کړي چې باید ژرترژره عملي شي.
په همدې حال کې د ملګرو ملتونو د پنا اخیستو ستر کمېشنر فېلیپو ګرانډي وايي، افغانستان کې شخړې، جګړه، ناامني، ډېر فقر، وزګارتیا او نهپراختیا د ډېری افغانانو د بېځایه کېدو او نورو هېوادونو ته د کډوال کېدو اصلي لاملونه دي.
د ګرانډي په وینا، ترهغې چې د کورنیو بېځایه شویو ستونزې حل نهشي، سوله نهشي راتللی.
.jpg)
نوموړی زیاتوي، د ملګرو ملتونو د کډوالۍ ادارې د افغانستان بېځایه شویو او کډوالو سره د مرستې لهپاره ۱۳۰ میلیونه ډالر راټول کړي چې د روغتیا، ښوونې او روزنې او د دوی نورو لازمو اړتیاوو په برخې کې به ولګول شي.
د ملګرو ملتونو د کډوالۍ چارو ادارې (UNHCR) او د دې سازمان د بشري چارو د همغږۍ ادارې (OCHA) په یوې ګډې اعلامیې کې لیکلي، ۴.۲ میلیونه افغانان د جګړو، بېځایه کېدو او طبعي پېښو؛ لکه: تلپاتې وچکالۍ له کبله بېړنیو بشري مرستو ته اړتیا لري. دغه راز ۸.۷ میلیونه نور د فقر، د وزګارتیا کچې ډېروالي او سخت ورځني ژوند له کبله بشري مرستو ته اړتیا لري.
د ملګرو ملتونو د کډوالۍ اداره په افغانستان کې د مرستندویان په وړاندې شته ګواښونو ته د اشارې ترڅنګ وايي، په روان کال کې ۲۳ مرستندویان وژل شوي او لسګونه نور تښتول شوي یا هم ګواښل شوي دي.
