په کندوز کې د "شیرخان پسران" لیسې ترڅنګ د هاوان مرمۍ لګېدو له امله یو زدهکړیال وژل شوی او ۱۰ نور ټپيان دي.
د کندوز سیمهییز چارواکي وايي، چې نن سهار ۹:۳۰ دقیقو راهیسې د هاوان ۶ مرمۍ د یاد ولایت پر بېلابېلو سیمو لګېدلي دي.
د شمال ختیځ زون د پولیسو ویاند محفوظ الله اکبري سلاموطندار ته وویل، چې وسلهوالو طالبانو دغه هاوانونه د کندوز له چهاردرې ولسوالۍ څخه د دغه ولایت د ښار پر بېلابېلو سیمو توغولي دي.
د یاد ولایت د امنیه قوماندانۍ ویاند انعامالدین رحماني سلاموطندار ته وویل، د دغو هاوانونو له امله یو تن وژل شوی او ۹ نور ټپيان دي، چې په ټپیانو کې د ښوونځي زدهکړیالان هم شامل دي.
له بل لوري یوې امنیتي سرچينې، چې نه يې غوښتي نوم يې واخیستل سلاموطندار سره د خبرو پر مهال وویل، چې د وسلهوالو طالبانو هدف د کندوز ولایت د ښاروالۍ هوټل و.
ده ویلي، چې دغه هوټل اوسمهال د افغان ځانګړو او نړیوالو ځواکونو د سوق او ادارې مرکز دی.
هغه دغه مرکز ته د اوښتو زیانونو په اړه څه نهدي ویلي.
له بل لوري بیا د کندوز حوزوي روغتون سرطبیبه مرضیه سلامیفتلي وايي، چې تر اوسه د شیرخان لیسې څخه دوی ته ۱۰ ټپيان او د یو تن مړی دوی ته ور ليږل شوي دي.
د معلوماتو پر بنسټ، چې نن سهار د وسلهوالو طالبانو لهخوا د کندوز ـ تخار لویه لاره هم بنده شوې ده.
