په هېواد کې د کورونا ویروس له خپرېدو راهیسې، د حکومت مرکزي ادارې سلګونه میلیونه افغانۍ په کندوز کې له کورونا ویروس سره مبارزې ته استولي؛ خو د دې ولایت ولایتي شورا او د مدني ټولنې یو شمېر فعالانو نن د یوې اعتراضیه غونډې پرمهال پر محلي حکومت تور پورې کړ چې له کورونا ویروس سره په مبارزه کې یې مديريت کمزوری دی او هغسې مبارزه یې نه ده کړې لکه څنګه چې تمه کېږي.
دغه راز د کندوز د ولایتي شورا رییس محمد یوسف ایوبي هم ټینګار کوي چې په دغه ولایت کې په کورونا ویروس د اخته کسانو شمېر له رسمي شمېرو ډېر ځله زیات دی او محلي حکومت له ویروس سره د مبارزې په تړاو حساب نه ورکوي.
دا په داسې حال کې ده چې د کندوز د والي ویاند عصمت الله مرادي دغه تورونه ردوي او وايي چې محلي حکومت له کورونا ویروس سره د مبارزې لپاره ځانګړې کمېټې جوړې کړې دي.
په کندوز ولایت کې د کورونا ویروس د خپرېدو راهیسې، ۱۷۸ کسان په دغې ناروغۍ اخته شوي چې له ډلې یې ۳۸ بېرته روغ شوي او ۶ یې مړه شوي دي.
