د بالاحصار سقوط
راپورونه وايي، چې د کندوز ښار اړوند د بالاحصار سیمه یو ساعت مخکې د طالبانو ولکې ته ولوېدله. ویل کېږي، چې د افغان ځواکونو یوه پنځوس نفري پوسته د څو ساعتونو له پاره د طالبانو تر محاصرې لاندې وه، چې بلاخره د طالبانو لاس ته ورغله.
تر اوسه دولتي سرچینو د دغې سیمې د سقوط په اړه رسنیو ته څه نه دي ویلي، خو د ملکي خلکو او یو شمېر امنیتي ځواکونو په خبره، بالاحصار له څو ورځو راهیسې د خوراکي توکو، اوبو او نظامي تجهیزاتو له کمښت سره مخ وه او مرکزي حکومت هم د دغې ولسوالۍ د سقوط په ناغېړي کوله.
د بغلان – کندوز لویه لار
د مرکزي بغلان ولسوالۍ ولسوال ګوهرخان بابري سلام وطندار ته وویل، چې طالبانو له درېيو خواوو د مرکزي بغلان – کندوز لاره په بمونو پوخلې ده او په ډېرو ځایونو کې یې پوستې هم جوړې کړې دي.
د ویلو ده، چې طالبانو د بغلان – کندوز پر لویه لاره د دند شهاب الدین په سیمه کې د امنیتي ځواکونو درې پوستې نیولې دي.
تخار ولایت
د تخار ولایت په اشکمش، خواجه غار، ینګي کلا او درقد ولسوالیو کې د امنیتي ځواکونو او طالبانو تر منځ سختې نښتې روانې دي، خو د زیانونو په اړه یې تر اوسه معلومات نه دي خپاره شوي.
ویل کېږي، چې د کندوز ولایت ډېر شمېر بې ځایه شوي او جنګ ځپلي وګړي د تخار ولایت مرکز ته کوچېدلي دي او د سرپناه تر څنګ د خوراکي توکو او اوبو له نشتوالي سره مخ دي.
