وسلهوالو طالبانو نن سهار د امامصاحب ولسوالۍ پر مرکز برید کړیدی.
د کندوز د ولایتي شورا غړی امرالدین ولي وايي چې طالبانو له پرون راهیسې د امامصاحب ولسوالۍ مرکز ته رسولي او پهدې موده کې یې روضه مبارک، نواباد او اقيبای سیمې نیولې دي.
د هغه په خبره، خلک د کورونو د پرېښودلو په حال کې دي او کهچېرې مسوولان د دې ولسوالۍ امنیت ته فکر ونهکړي؛ ډېر ژر به ټوله ولسوالي د طالبانو لاس ته ولوېږي.
د کندوز د امنیت امر صفيالله مخزون دا پېښه تاییدوي او وايي چې مرستندویه ځواکونه ولسوالۍ ته رسېدلي او ډېر ژر به د دې ولسوالۍ امنیتي وضعیت ښه شي.
ځايي چارواکي وايي، د کندوز په سهدرک او چرخاب سیمو کې هم امنیتي ځواکونو او طالبانو ترمنځ نښتې روانې دي.
