د کندهار د والي وياند بهير احمدي وايي، وسلهوالو طالبانو نن سهار درې بجې د دغه ولایت د شاهوليکوټ ولسوالي پر امنيې قومانداني موټربم بريد کړی چې د مرګژوبلې ترڅنګ یې، مالي زیانونه هم اړولي دي.
د احمدي په وینا، په یاد بريد کې درې پوليس وژل شوي او څوارلس نور ټپیان دي.
وسلهوال طالبان بيا په بريد کې ډېر شمېر امنیتي ځواکونو ته د مرګژوبلې اړولو ادعا کوي، خو چارواکي يې د هغوی ادعا بېبنسټه بولي.
شاهوليکوټ ولسوالي د کندهارـروزګان ترمنځ پرته ده چې ډېر کله له روزګان ولایت نه ورته وسلهوال را اوړي او هلته بریدونه او چاودنې کوي.
په دې ولسوالي کې د اوبو یو ستر بند هم شته چې نه یوازې د خلکو پر مېلهځای بدل شوی، بلکې ګڼې سیمې هم خړوبوي.
