ولسي جرګې نن ورځ د مخابراتو او معلوماتي ټکنالوژۍ وزیر شهزادګل اریوبي له کرېډټ کارتونو د ۱۰سلنه مالیې اخیستو کې د فساد په اړه شوې ادعا سپيناوي او د مالیې ګرځولو څرنګوالي په اړه ورغوښتی و.
ځېنو وکیلانو په دغې مالیه کې د فساد په اړه د اندېښنې په ښودلو سره وویل تر هغو چې د دې پیسو حساب روښانه شوی نه وي دغه بهیر باید ودرول شي.
دوی له وزیره وغښتل چې د دې ستونزې لېرې کولو لهپاره کوټلي ګامونه واخلي.
د ولسي جرګې غړي صالح محمد سلجوقي او ذکیه سنګین وویل، د دوی د څېړنې او معلوماتو پربنست له ۱۰سلنې مالیې ۸ سلنه یې شخصي جېبونو ته ورځي او ۲ سلنه یې د دولت بودیجې ته جمع کېږي. دوی وايي، یوازې درې تنه دي چې په دغه بهیر واک او کنترول لري.
په همدې حال کې د مخابراتو او معلوماتي تکنالوژۍ وزیر شهزادګل اریوبي د وکیلانو اندېښنو په ځواب کې وویل لاهم د پیسو راټولولو لهپاره د څارنې ځانګړی سیستم نه شته؛ خو هڅه کوي ډېر ژر د بلینګ په نوم برېښنایي سیستم فعال کړي.
د ښاغلي اریوبي په وینا دوی هم له کرېډټ کارتونو د ۱۰سلنه مالیې راټولولو له اوسني سیستمه خوښ نه دي.
د مخابراتو وزیر وایي د بلینګ برېښنایي سیستم په جوړولو سره عواید زیات او رڼښت تضمینیږي.
له بله پلوه د ولسي جرګې دویم مرستیال امیرخانیار چې د ولسي جرګې نننۍ غونډې مشري یې کوله، له وزیره وغوښتل د بلینګ برېښنایي سیستم پېرودلو په موخه جدي اقدام وکړي.
له کرېډټ کارتونو د ۱۰سلنې مالیې اخیستو په اړه د ولسمشر تقنیني فرمان څه موده مخکې د خلکو شکایتونو له امله ولسي جرګې لغوه کړ.
وکیلانو وویل د څارنې ځانګړي سیستم تر جوړېدو پورې دې دغه بهیر ودرول شي، خو مشرانو جرګې یو ځل بیا دغه فرمان تایید کړ او لاهم د هغه تایید یا رد په اړه د ملي شورا ګډ پلاوي برخلیک نه دی څرګند.
