د افغانستان د کانونو او پطرولیم وزیر داود شاه سبا وايي، چې د هېواد اوسنيو شرایطو ته په کتو سره د کانونو ویستل د هېواد په ګټه نه شي تمامېدی.
هغه وايي، په خواشينۍ سره اوسمهال د کانونو او پطرولیم په وزارت کې داسې ظرفیت نه شته، چې د کانونو د تطبیق له پاره يو ساده پلان طرحه کړي.
د داود شاه سبا په وينا، د حاجيګک د کان تړون تر اوسه نه دی لاسلیک شوی، ځکه د هندوستان هغه کنوانسیون چې دغه تړون ګټلی وو اوس د کان را ایستلو څخه انکار کوي.
سبا زياته کړه، هندي چارواکو ورته ویلي، چې د حاجيګک د کان ویستل اوس ورته ګټه نه کوي.
د معلوماتو پر بنست داود شاه سبا ته د هندي چارواکو له لوري د حاجيګک کان نه ایستلو عمده لامل په نړېواله کچه د اوسپنې د بيې ټيټوالی په ګوته شوی.
ده دا هم وویل، د افغان دولت سره په ګډه باید پانګونه وکړي، چې په هغه کې ۲۰۰ کیلومتره د اوسپنې پټلۍ، ۲۰۰ کیلومتره سړک او ۲۰۰ کیلومتره د برښنا د مزي غځول اوداسې نور هم شامل دي، چې دا د افغانستان له توانه پورته ده.
د کانونو او پطرولیم وزیر داود شاه سبا پورته ویناوې د ولسي جرګې په نننۍ عمومي غونډه کې وکړې.
دی د ولسي جرګې د غړو له لوري په دې موخه را بلل شوی وو، چې د لوګر د عېنکو د مسو او بامیانو د حاجیګکو د اوسپینې د کانونو د تړونونو په اړه د ولسي جرګې غړیو ته معلومات ورکړي او د وکیلانو پوښتنې ځواب کړي.
نوموړي وویل، په افغانستان د ظرفیت نشتوالي له امله بهرنيو کمپنيو ته په سلګونه پلمې شته، چې په دغو پلمو زمونږ کانونو قيمت را ټيټ کړي.
د نوموړي په وينا، اوسمهال لازمه دا ده، چې د سترو کانونو د ایستلو څخه صرف نظر وکړو او د هېواد په وړو کانونو کار پېل کړو.
هغه وايي، په دې سره به د لويو کانونو له پاره کافي تجربه هم ترلاسه کړو.
همدارنګه د لوګر د مېس عېنک د کان په اړه داود شاه سبا وویل، تړون یې لاسلیک شوی او په تړون کې راغلي، چې ۸۰۰ میلیونه ډالرو د ورکړې ترڅنګ به د مېسو د ذوب فابریکه هم جوړوي.
د ولسي جرګې د غونډې په پای کې پرېکړه وشوه، چې د کانونو او پطرولیم وزیر دې د راتلونکي دوشنبې په ورځ د لا وضاحت په موخه بیا د غونډې تالار ته را وبلل شي.
