د کاناډا سترې محکمې د دغه هېواد ولسي جرګې ته موکه ورکړی، چې «له ځانوژنې سره مرسته» په نامه د ناعلاجو ناروغیو د ناروغانو له پاره قانون جوړ کړي.
له دې وړاندې د کاناډا سترې محکمې، هغو ناروغانو ته چې د ځانوژنې غوښتونکي دي؛ د سترې محکمې د ځانګړو احکامو له مخې خپلو تقاضاو ته رسېدل، خو دا ځل د اوتاوا ستره محکمه غواړي، چې دغو غوښتنې چټکتیا پیدا کړي.
د دغه قانون په مخکې تر ټولو مهم خنډونه، د ځانوژنې نه د منع قانون او د کاناډا اساسي قانونونه دي؛ اساسي قانون په دې اړه تر یو حده تعدیل شوی، خو د ځانوژنې نه د منع قانون، چې په ۲۰۱۴ کال کې تصویب شوی؛ د تعدیل په تړاو څلور میاشتې وخت غوښتی دی.
د کاناډا لبرالي مشرانو د حساسیت له مخې له ځانوژنې سره د مرستې ټولیز او کره قانون په اړه ۶ میاشتې وخت غوښتی و.
د کاناډا په سلو کې ۸۵ سلنه خلک د ناروغانو له پاره د دغه قانون د جوړېدا ملاتړ کوي. د دماغو هغه ناروغان، چې په کلونو- کلونو د کوما په حالت کې وي، هغه ناروغان چې د ډاکټرانو هیلې ترې پرې شوې وي او هغه کسان چې عمرونه یې خوړلی وي؛ په دغه قانون کې شامل دي.
کاناډا یوازینی هېواد نه دی، چې د ځانوژنې قانون جوړوي، بلکې له دې وړاندې بلجیم، لوکزامبورګ او نیدرلینډ هم د قانوني مرګ په تړاو قوانین جوړ کړي وو.
