.jpg)
د کابل ښار اوومه ناحیه کې د وژل شويو کسانو کورنۍ چې غړي یې تېره اوونۍ د ناپېژاندو کسانو له لوري ووژل شول، له حکومته غواړي چې قاتلان يې ونيسي او د عدالت ټيڼګولو په موخه دې يادو کسانو ته جزا ورکړي.
پوره یوه اوونۍ وړاندې ناپېژاندو کسانو د کابل ښار اوومه ناحیه کې د ټرانسپورت وزارت د یوه کارکوونکي کور ته دننه شول چې د هغه مېرمن او درې ماشومان یې په ترخز ووژل.
اوس د یوې اوونۍ په تېرېدو سره د دغو وژل شويو د کورنۍ غړي حکومت نه د عدالت تامینېدو غوښتنه کوي.
نوراقا کوم پلار چې خپله لور بصیره او درې لمسیان یې دغه پېښه کې له لاسه ورکړي وايي، د دغې وژنې عاملان تراوسه نه دي نیول شوي.
دی وايي، پېښه د شخصي خصومتونو له کبله شوې ده.
.jpg)
د نوراقا په وینا، کله چې یې خپله لور او لمسیان د وروستي ځل لپاره ولیدل مخونه یې په وینو ککړ وو او په بدن یې ژور ټپونه شوي وو.
د کابل د امنیې قومندانۍ ویاند فردوس فرامرز سلاموطندار ته وايي، د دغې کورنۍ د څلورو وژل شويو غړو په تړاو څېړنې روانې دي او دې برخه کې پرمختګ هم شوی دی.
کابل ښار کې جنايي جرایم او وسلهوالې وژنې داسې مهال زیاتې شوي چې د کورنیو چارو وزارت دې وروستیو کې کابل ښار کې د جنايي جرمونو د لاملانو نیولو لپاره عملیات پيل کړي؛ خو لکه څنګه چې لیدل کېږي، دغه عملیات ګټور نه دي تمام شوي.
