د کابل زون د اوبو رسولو رییس سردارولي ملکزي په دې اړه جوړې شوې غونډې ته وویل، د چټلو اوبو په اړه د شاهشهید سیمې د اوسېدونکیو له شکایتونو او هلوځلو وروسته یې دغو کورنیو ته د څښاک پاک اوبو رسولو چارې پیل کړي دي.
ښاغلی ملکزی وايي، د صفت ودانیز شرکت سره تړون لاسلیک شوی او ژمن دی چې د یو کال کې به د شاهشهید ۳۵۰۰ کورنیو ته د څښاک پاکې اوبه ورسوي.
نوموړی وايي، کورنیو ته د څښاک پاکو اوبو رسولو دغه پروژه ۲۸ اعشاریه ۷ کیلومتره ده چې لګښت یې هم څه دپاسه ۸۴ میلیونه افغانۍ کېږي.
په ورته وخت کې د اوبو رسولو او کانالیزاسیون عمومي شرکت رییس حمیدالله یلاني وايي، دوی هڅه کوي د کابل نورو سیمو کې هم چې اوبه یې ککړې دي ورته پروژې عملي کړي.
شاهشهید کې د یوې سیمې ګذر وکیل سخي وویل، له کورنیو جګړو را وروسته یې د څښاک اوبه ککړې شوي چې ماشومان به له ډول ډول ناروغیو سره مخ وو.
د هغه په وینا، اړوند چارواکیو ته د سیمې اوسېدونکیو له شکایتونو وروسته د پاکو اوبو رسولو پروژې چارې پیل شوې.
دا داسې مهال دی چې د کابل په ګډون د هېواد ډېرو لویو او وړو ښارونو کې د څښاک اوبو ستونزه شته او داسې رپوټونه هم خپاره شوي چې ډېری خلک د څښاک د پاکو اوبو نهشتوالي لهامله په ناروغیو اخته کېږي.
