په کابل کې یو شمېر دیني عالمان، د جوماتونو ملاامامان او د پلازمینې د عالمانو شورا ځينې غړي له افغان حکومته غواړي، چې د افغانستان عالمانو شورا غړي دې له دندو ګوښه کړي.
دوی وايي، چې د عالمانو شورا په خپلو کړنو کې پاتې راغلي او باید پرځای يې ځوان دیني عالمان په دغه شورا کې پر دندو وګومارل شي.
د کابل د عالمانو شورا د دوشنبې په ورځ خبري غونډې ته وویل، چې بلخ کې پر ۲۰۹ شاهین قول اردو باندې د طالبانو برید د سیمې د استخباراتو کار د ټولو اسلامي او انساني ارزښتونو خلاف دی.
د کابل د عالمانو شورا رییس عبدالبصیر حقاني غونډې کې د افغانستان سراسري شورا غړي په ناغیړۍ تورن کړل او له ولسمشرۍ ماڼۍ يې وغوښتل، چې باید د دوی پرځای د کابل د عالمانو شورا پر دندو وګومارل شي.
د کابل د عالمانو شورا غړی محمد سالم محسني هم وايي، چې اوسمهال د سیمې استخبارات ځینې کسان د جهاد لهپاره افغانستان ته استوي، ترڅو بېګناه کسان ووژني په داسې حال کې چې افغانستان کې د جهاد حکم لغوه دی.
د محسني پروینا، د اسلامي قانون پر بنسټ افغانستان کې د جهاد شرایط نشته.
"په افغانستان کې د جهاد ادعا دروغ او د اسلام دستوراتو خلاف دی ددې له پاره چې هیڅ یو معیار چې پر بنسټ يي باید د جهاد ادعا وشي په افغانستان کې نشته افغانستان دارلحرب او دارلکفر دی معیارونه صدق نه کوي خلک مسلمانان او افغانستان یو اسلامي هیواد دی."
د کابل د عالمانو شورا د عامه پوهاي روښانه کولو په برخه کې سراسري شورا ناکامه بولي او وايي، سره له دې چې پر دغې شورا زیاتې پیسې لګیدلي بیاهم لاسته راوړنې نه لري.
خو د افغانستان د عالمانو سراسري شورا ویاند محمد قاسم حلیمي وايي، چې په هیواد کې د پیښو په اړه د شورا دریځ تل روښانه و او چپ پاتې شوي نه دي.
حلیمي زیاته کړه، د پیښو په اړه دریځ یوازې د عالمانو شورا مسوولیت نهدی، بلکې د ټولو جوماتونو ملایان او دیني عالمان باید د ورته شان پیښو په تړاو خپل اسلامي او انساني مسوولیت پر ځای کړي.
د افغانستان د عالمانو سراسري شورا ویاند وايي، په دې شورا کې د بدلونونو راوړلو سره د هیوا ستونزې نه هواریږي.
