د لوړو زدهکړو وزیر نجیبالله خواجهعمري نن د کابل حوزې کانکور د ازموینې په پرانیستغونډه کې وویل، د ۱۳۹۶ کال د فارغانو کانکور ازموینه د لومړي ځل لهپاره د روان کال د وري په ۹مه نېټه له لوګر، پنجشېر، بادغیس او نیمروز ولایتونو څخه پیل شوه.
په سږني کانکور کې د ګډونوالو ټولیز شمېر د ۲ زره او ۵۱۳ دیني مدرسو فارغانو په ګډون ۱۴۵ زره او ۸۹۱ کسانو ته رسېږي.
د ښاغلي خواجهعمري په وینا، د دیني علومو برخې، شپې ښوونځیو او څوارلسم پاسانو په ګډون د کابل حوزې ګډونوالو شمېر ۵۷ زره او ۹۲۹ کسان دي.
د لوړو زدهکړو وزیر وايي، د سږ کال په کانکور ازموینه کې د رڼښت تضمین او درغلیو مخنیوي لهپاره، ګډونوالو یو ځل له کانکور ازموینې وړاندې او یو ځل هم له ازموینې وروسته بایومتریک کېږي او هر ګډونوال د کانکور یوه ځانګړې کتابچه لري.
د لوړو زدهکړو وزیر نجیبالله خواجهعمري په وینا، د روان کال د کانکور ازموینې پایلې به د اسد میاشتې تر ۱۰مې نېټې اعلان شي.
د کابل حوزې د کانکور ازموینې لومړي پړاو کې ۱۴زره او ۶۶۴ داوطالبانو ګډون کړی چې له دې ډلې ۵ زره او ۴۴ تنه یې نجونې دي.
د دې ازموینې دویم پړاو کې ـ چې سبا به ترسره شي ـ ۱۴ زره او ۹۵۴ ګډونوال برخه واخلي.
د لوړو زدهکړو وزارت چارواکي همدارنګه وايي، د کابل حوزې د کانکور ازموینې درېیم او څلورم پړاو به هم نږدې راتلونکې کې واخېستل شي چې متفرقه برخه هم پهکې شاملېږي.
د کابل حوزې د کانکور ازموینې لومړي پړاو دوه ګډونوال تبسم او مژګان له دولت او لوړو زدهکړو وزارت غواړي چې د کانکور ازموینې بهیر په یو شفاف بهیر بدل کړي.
د دوی په وینا، دولت باید د هغو کسانو ازموینې کې بېپایلې زدهکوونکیو ته هم د زدهکړو د دوام زمینه برابره کړي.
ویل کېږي، دولتي پوهنتونونو او لوړو زدهکړو موسېسو کې د جذبوونکیو کسانو شمېر ۶۲زره او ۶۶۲ کسان، نیمه لوړو دولتي زدهکړو موسېسو کې ۵۳ زره او ۷۷۰ کسانو او دیني مدرسو کې هم یو زرو او ۱۵۰ تنو رسېږي.
د معلوماتو لهمخې به په ورته وخت کې د ۸ زره او ۸۵۱ څوارلسم پاسه داوطلبانو له ډلې ۴ زره او ۵۸۰ کسان د لوړو زدهکړو موسېسو او بنسټونو ته جذب شي.
د یادونې وړ ده چې د هېواد ۳۴ ولایتونو له ډلې یوازې د ننګرهار ولایت کانکور ازموینه نهده ترسره شوې چې تر راتلونکیو درېیوو ورځو پورې به دغه ولایت کې د داوطلبانو بایومتریک بهیر پیل شي.
