په کابل کې د هلمند د پخواني والي محمد نعیم بلوچ پر کور د تېرې شپې درېواړه برید ګر وژل شوي او سیمه په بشپړ ډول د امنیتي ځواکونو په ولکه کې ده.
د کابل امنیه قومندان عبدالرحمان رحیمي په سیمه کې رسنیو ته وویل، چې دغه پېښه تېره شپه د شپې شاوخوا ۸ بجې پیل شوې وه او نن د (اوکټوبر په ۶مه) شاوخوا ۹ بجې پای ته ورسېدله.
د رحیمي پر وینا، د بریدګرو هدف د هلمند د پخواني والي محمد نعیم بلوچ کور. ده د بلوچ د کورنۍ ته د اوښتو زیانونو په اړه څه ونه ویل.
د کابل امنیه قومندان رسنیو ته وویل، چې په دغه برید کې ۷ امنیتي ځواکونه ټپیان شوي دي، خو ملکي وګړو ته کوم زیان نه دی رسېدلی.
خو بل خوا وسله وال طالبان د برید له امله د زیاتو مالي او ځاني زیانونو د اړولو ادعا کوي.
د وسله والو طالبانو ویاند ذبیح الله مجاهد رسنیو ته ویلي، چې برید یې پر یو استخباراتي مرکز کړی دی.
لومړني معلومات
وسله والو طالبانو د پلازمېنې کابل د دارالامان په سیمه کې د روسیې سفارت ته څېرمه د یو حکومتي چارواکي پر کور برید کړی دی.
برید ګرو لومړی چاودنه او ځانمرګی برید وکړ او د دغه کور ته د ننه شول.
په سیمه کې لا هم د امنیتي ځواکونو او وسله والو تر منځ نښته روانه ده.
عیني شاهدان وايي، چې لومړی یې د څو درنو چاودنو غږونه اورېدل شوي او له هغې وروسته ډزې پیل شوې دي.
ذبیح الله مجاهد، چې ځان د طالبانو ویاند معرفي کوي، د دغه برید مسولیت مني.
نوموړي وايي، چې دغه برید یې د دې له پاره کړی، چې مهم "اطلاعاتي مرکز له منځه یوسي."
د کورنیو چارو وازت ویاند صدیق صدیقي وايي، امنیتي ځواکونه سیمې کې موجود دي او هغه کور ته چې وسله وال طالبان ننوتي؛ د امنیتي ځواکونو له خوا بند شوی دی.
ویل کیږي، چې دغه برید د هلمند ولایت د پخواني والي نعیم بلوچ په کور شوی دی.
خو د سیمې خلکو پر خبره، په دغه سیمه کې د ولسمشر سلاکار نجیب الله ناصري او د ولسي جرګې د یو شمېر استازو کورونه دي.
اټکل کیږي، چې دغه برید د ولسمشر د سلاکار په کور پلان شوی دی.
تر اوسه پورې د دغه برید د تلفاتو کره شمېر معلوم نه دی.
