.jpg)
د کابل ښار ۱۲ ناحیې اوسېدونکي د ځمکو له غصب شکایت کوي او وايي، د ځمکو زیاتره غاصبین د ولسي جرګې غړي، قومي مشران او حکومتي چارواکي دي.
د راپورونو پر بنسټ په پلازمېنه کابل کې د زورواکو له خوا د ځمکو غصب لړۍ روانه ده، خو د ولسي جرګې د مواصلاتو او مخابراتو کمېسیون نن د دې شکایتونو د ارزولو په موخه غونډه جوړه کړه.
د کابل ښار د احمدشاه بابا مېنې اوسېدونکي له حکومته غواړي، چې ژر تر ژره دې دغه ستونزه وڅېړي.
ابراهیم د احمدشاه بابا مېنې د ګذر وکیلانو له ډلې دی.
دی وايي، چې د ولسي جرګې استازي ملاتره خېل ورور حاجي موسی یې په شخصي ځمکه څو کانتینرونه ایښي دي او غواړي، په دې سیمه کې د تېلو ټانک جوړ کړي.
د دې سیمې یو بل استوګن خلیل وویل، د احمدشاه بابا مېنې د پروژې د پرانیستې پرمهال یوه ستره سیمه د هدېرې له پاره ځانکړې شوې وه، چې وروسته بیا درې ځلې د زورواکو له لوري غصب شوه.
د کابل ښاروالۍ چارواکي بیا دغه ستونزه مني او وايي، چې د ځمکو غصب مخنیوي پر برخه کې تر ټولو ستره ستونزه داده، چې له "زورواکو" سره مخامخ دي.
د ولسي جرګې د مواصلاتو او مخابراتو کمېسیون رییس قیس حسن وايي، چې کمېسیون د خلکو ټولنې ستونزې څېړلي دي او ډېر ژره به دغه ستونزې حل کړي.
