د برازیل په (ریو) ښار کې پیلیدونکو سترو المپیک سیالیو کې د ځغاستې نړۍ اتل "جمیکایي اوسین بولټ" لوبیدل د "ورون" د ټپونو له کبله شکمن ښکاري.
د (انډیا ټایمز) ورځپاڼې د راپور له مخې، د ځغاستې نړۍ چټک لوبغاړی اوسین بولټ د ورون ټپونو له کبله د جمیکا په وروستي پړاو ټاکنیزو ملي سیالیو کې ګډون ونه کړای شو.
ټاکل شوې وه، د ځغاستې نړۍ چټک لوبغاړي جمیکایي اوسین بولټ په خپل هیواد کې د ۱۰۰ میترو په ځغاستې وروستۍ ټاکنیزه سیالۍ کې ګډون کړي وای، خو له نیمه پای لوبې وروسته ټپي شو.
ویل کیږي، چې د اوسین بولټ په پښه (ورون) کې بریخ پیدا شوی او له پای سیالۍ څخه لاس په سر شو.
داسې ویره هم ښودل شوې ده، چې ښایي اوسین بولټ د ۲۰۱۶ م ز کال برازیل په سترو المپیک نړیوالو سیالیو کې هم ګډون و نه شي کړای، خو په دې اړه رسمي پریکړه نه ده شوې.
ټاکل شوې ده، چې د برازیل سترې المپیک سیالۍ د روان کال په اګست میاشت کې د نړۍ د زرګونه لوبغاړو ترمینځ په (ریو) ښار کې پیل شي.
د یادونې وړ ده، چې اوسین بولټ د ۲۰۰۸ م ز کال (بیجینګ) او دغه راز د ۲۰۱۲ کال (لندن) المپیک سیالیو څخه په ۱۰۰ ، ۲۰۰ او ۴۰۰ میترو واټن کې د سرو زرو مډالونه ګټلي دي.
تراوسه د المپیک په تاریخ کې داسې نه دي شوي، چې یوه لوبغاړي درې ځلې د المپیک په نړیوالو سیالیو کې د سرو زرو مډال ګټلي وي.
اوسین بولټ د دغه تاریخ جوړولو چانس لري، خو تر ټولو مهمه داده، چې د نوموړي ټپونه ډير ژور نه وي او وکولای شي د برازیل المپیک سیالیو ته تیار شي.
په همدې حال کې په جمیکا هیواد کې دننه او بهر مینه وال په دې تمه او دعا دي، چې د دوی ستوری لوبغاړی اوسین بولټ د برازیل المپیک سیالیو کې ګډون وکړي او یو ځل بیا د سرو زرو مډال وګټي.
ویل کیږي، چې د خپل هیواد په کچه د ټاکنیزو سیالیو څخه پاتې کیدو سره سره بیا هم اوسین بولټ په روغیدو سره کولای شي په برازیل المپیک سیالیو کې لوبې وکړي.
