.jpg)
د پکتیا چارواکي وايي، چې د دغه ولایت په ګمرکي عوایدو کې د پام وړ زیاتوالی راغلی.
دوی وايي، چې یوازې له ګمرک څخه دوی په یوه میاشت کې میلیونونه افغانۍ عاید تر لاسه کړي دي.
د پکتیا د والي ویاند نقیب احمد اتل د یوې خبري ناستې په ترڅ کې وویل، چې دوی یوازې له ګمرکي عوایدو د غويي په میاشت کې شاوخوا ۴۰ میلیونه افغانۍ تر لاسه کړي و، خو یوه میاشت وروسته( د غبرګولي) په میاشت کې د دوی دغه عواید ۸۴ میلیونو افغانیو ته لوړ شول.
د دوی د راپور له مخې په یوه میاشت کې د پکتیا په ګمرکي عوایدو کې شاوخوا دوه برابره زیاتوالی راغلی دی.
همدارنګه نوموړي زیاته کړه، چې د دوی د لومړنیو معلوماتو له مخې د پکتیا په عمومي عوایدو کې بیا د یو کال په ترڅ کې (۱۳۹۳ څخه تر ۱۳۹۴) پورې ۳۶ سلنه زیاتوالی راغلی دی، چې د معلوماتو پر بنسټ په دغه زیاتوالي کې بیا عایداتي ادارې او ګمرکي عواید هم شامليږي.
هغه د نورو کلونو عوایدو ته اشاره نه ده کړې، خو یوازې يې دا ویلي، چې سږکال په دغه کچه زیاتوالی راغلی دی.
دوی يې لاملونه په فرعي لارو د باردارو موټرو مخنيوی او د ادارو تر منځ همغږي په ګوته کوي.
د پکتیا ولایت د چارواکو پر وینا، د کميشنکارانو په مخ يې هغه فرعي لارې تړلې، چې پخوا به يې موټر په پټه له ګمرکه تېرول.
