په پوهنې وزارت کې د فساد موجودیت او کم کارۍ دغه وزارت ته د ۱۳۴ میلیونه ځانکړو شوو ډالرو د لګښت مخنیوی کړی دی.
اسدالله حنیف بلخي په هرات ولایت کې د یوې غونډې پر مهال زده کوونکو او سیمه ییزو مسولینو ته وویل، چې د دوی ۳ میاشتنیو څېړنو ښودلې، چې په پوهنې وزارت کې د اداري فساد، کم کاري او د ظرفیتونو د نشتوالي له امله نړیوالو مرستو ۱۳۴ میلیونه ځانکړې شوي ډالر نه دي لګول شوي.
د پوهنې وزیر دغه خبرې د (اګسټ په ۱۲مه) نېټه کړې دي.
بلخي وايي، چې دغه ډالر باید د روان کال د سپټمبر تر پایه پورې مصرف شوې وی، خو دوی له مالیې وزارت نه غوښتنه وکړه، چې د راتلونکي کال د سپټمبر میاشتې تر پایه پورې دې وخت ورکړل شي.
ده وویل، چې دغه پیسې به د ښوونځیو د رغونې، تجهیزاتو او د ظرفیتونو د لوړولو په برخه کې مصرف کړي.
نوموړي وویل، چې د نړیوالې ټولنې له خوا د پوهنې له وزارت سره نورې ډېرې مرستې هم شوي دي. ده زیاته کړه، چې موږ په دې لټه کې یو، چې دغه پیسې هم په مناسبو ځایونو کې مصرف شي.
د دغو پیسو له شمېر نه ۱۹۲ میلیونه افغانۍ د اضافه کارۍ او ۸۰۰ میلیونه افغانۍ د ښوونکو د امتیازاتو لپاره په پام کې نیول شوي دي او د مالي کال په دویمه نیمايي کې به دغه بودیجه د مالي وزارت له خوا د پوهنې وزارت ته ورکړل شي.
د پوهنې وزیر وویل، ښوونکو ته د ځمکو د ویش چارې یې په دوو لنډمهالو او اوږدمهالو مرحلو کې پام کې نیولي، چې د وزیرانو شورا د پرېکړې پر بنسټ به په لنډمهال کې ښوونکو ته ځمکې ووېشل شي او د اوږدمهال لپاره به د ښار جوړونې د وزارت په مرسته به د بېوزله ښوونکو لپاره کورونه جوړ شي.
په ورته وخت کې د هرات ولایت د شینډنډ ولسوالۍ ښوونکو د یو لاریون پر مهال د پوهنې له وزیر نه د دوی د ۸ میاشتو د وروسته پاتې شوو حقونو غوښتنه وکړه.
ښونکو خبرداری ورکړ، که معاشونه یې ور نه کړل شي؛ د زده کوونکو پر مخ به د ښوونځیو دروازې وتړي.
خو د پوهنې وزیر له ښوونکو سره ژمنه وکړه، چې ډېر ژر به د دوی حقونه ورکړل شي.
د راپورونو پر بنسټ، له دې مخکې هم پوهنې وزارت کې د خیالي ښوونځیو او د همدغو ښوونځیو د ښوونکو د حقونو د ورکولو پر اساس د میلیونونو ډالرو د ضایع کېدلو راپورنه خپاره شوي وو.
