تمنا هغه نجلۍ ده، چې د زدکړو د دوام لپاره، د خپل پلار له خوا د غیر اخلاقي غوښتنو قرباني شوې ده. د بغلان استیناف محکمې یوې څارنوالې مژګان سلام وطندار راډیو ته وویل، چې د ۱۷ کلنې تمنا پلار څو ځلې پر هغې جنسي تېری کړی دی.
د دغې څارنوالې په په خبره، د نجلۍ پلار د پولیسو له خوا نیول شوی او په خپل جرم یې اعتراف کړی دی.
د تمنا پلار خپلې لور ته ویلي، که غواړي، زده کړو ته دوام ورکړي؛ نو له هغه سره دې جنسي اړیکه ولري.
تمنا تر اوسه د امن په کور کې ده.
د بغلان ولایت د ښځو چارو رییسې خدیجې یقین د ټيلفون له لارې د دغې موضوع د تائید تر څنګ وویل، د تمنا مور هم له څه وخت راهیسې د یو شمېر جرمونو له امله په زندان کې ده.
میرمنه یقین زیاتوي، چې دوی د دغې کورنۍ له څلورو کوچنیانو دوه تنه د امن کور ته وړي او دوه تنه يې د کم عمرۍ له امله زندان ته د مور خوا ته ورلېږلي دي.
په بغلان ولایت کې په تېره یوه میاشت کې دا دویم جنسي تېری دی، چې پر محارمو کېږي.
همدا تېره اونۍ د یوې کورنۍ ۱۴، ۱۸، او ۲۲ کلنې نجونې چې تازه له ایرانه افغانستان ته راستنې شوې وې؛ له خپل پلار نه یې د زده کړو د ممانعت په پار شکایت کړی و. د دې درېيو خویندو له ډلې تر ټول کشرۍ هغې ادعا کړې، چې نیشه يي پلار یې څو ځلې له هغې د جنسي اړیکو غوښتنه کړې ده.
سره له دې چې د نجونو مور او پلار وايي، چې خپلو لورګانو ته به د زده کړې اسانتیاوې برابرې کړي، خو یادې نجونې وايي، هیڅکله به بېرته خپل کور ته ستانه نه شي.
د دغو نجونو پلار پر هغه تپل شوي، ټول تورونه بې ځایه بولي.
خو له دې سره – سره د بغلان ولایت د ښځو چارو رییسه په دې باور ده، چې د تېر کال په پرتله په دې کال کې له ښځو سره د زور زیاتي قضيې کمې شوې دي. تېر کال دغه ریاست سره ۲۵۲ پېښې ثبت کړې وې، خو سږ کال یې د تاوتریخوالي ۲۲۵ پېښې ثبت کړي دي.
د ښځو پر وړاندې د تاوتریخوالي د نړۍ والو راپورنو له مخې ډیري تاوتریخوالي په مرکزي افریقې هیوادونو او کم یې هم د سویلي اسیا په هیوادونو کې رامنځ ته شوي، خو د افغانستان لېرې پرتې سیمې بیا له دې ډول پېښو خوندي نه دي پاتې شوي.
